బకాయిల వసూళ్లు వేగవంతం చేయాలి.

చిల్పూర్, అక్టోబర్ 28 (తెలంగాణ ముచ్చట్లు):

వినియోగదారులు బకాయిలు లేకుండా విద్యుత్ బిల్లులు సకాలంలో చెల్లించాలని ఘనపూర్ డివిజన్ డీఈ బి.సారయ్య సూచించారు.
బుధవారం మండల కేంద్రంలోని విద్యుత్ అసిస్టెంట్ ఇంజనీర్ కార్యాలయంలో ఏడీఈ పి.రణధీర్ రెడ్డితో కలిసి విద్యుత్ సిబ్బందితో బకాయిలపై సమీక్షా సమావేశం నిర్వహించారు. ఈ సందర్భంగా డీఈ మాట్లాడుతూ నెల చివరి వారం కావడంతో బకాయిల వసూళ్లు నిర్దేశిత లక్ష్యం చేరుకునేలా వసూలు ప్రక్రియను వేగవంతం చేయాలని సిబ్బందికి సూచించారు.బకాయిల వసూళ్లతో పాటు సిబ్బంది విధి నిర్వహణలో 'వన్ మినిట్ రూల్' విధానాన్ని తప్పనిసరిగా పాటిస్తూ ప్రమాదాలను నివారించాలని ఆదేశించారు. అర్నబ్ తుఫాన్ ప్రభావం డివిజన్ పరిధిలో పడకుండా అన్ని జాగ్రత్తలు తీసుకుంటున్నామని, వినియోగదారులు కూడా భద్రతా జాగ్రత్తలు పాటిస్తూ అప్రమత్తంగా ఉండాలన్నారు. విద్యుత్ సరఫరాలో ఎక్కడ ఎలాంటి సమస్యలు గుర్తించినా వెంటనే సిబ్బందికి సమాచారం అందించాలని సూచించారు.వినియోగదారులు ఇంటి వద్ద నుండే మొబైల్, ఆన్ లైన్ మాధ్యమాల ద్వారా బిల్లులు చెల్లించే సులభమైన పద్ధతులను ఉపయోగించుకోవాలని కోరారు.ఈ కార్యక్రమంలో రాజవరం ఏఈ ఆర్.సురేష్, లైన్ ఇన్ స్పెక్టర్లు రామ్మూర్తి, కుమారస్వామి, కృష్ణంరాజు, లైన్ మెన్ లు గణేష్, సాంభరాజు, అశోక్, సురేష్ తదితరులు పాల్గొన్నారు.