గ్రామాల అభివృద్ధికి గ్రామపంచాయతీ భవనాలు ఎంతో అవసరం.
చిట్యాల వెంకటయ్య, వీరాయపల్లి సర్పంచ్.
పెద్దమందడి,నవంబర్20(తెలంగాణ ముచ్చట్లు):
వనపర్తి జిల్లా పెద్దమందడి మండలం వీరాయపల్లి గ్రామంలో నూతన గ్రామపంచాయతీ భవన నిర్మాణానికి గ్రామ సర్పంచ్ చిట్యాల వెంకటయ్య మండల కాంగ్రెస్ నాయకులతో కలిసి భూమిపూజ నిర్వహించారు. ఎన్ఆర్ఈజీఎస్ నిధులు రూ.20 లక్షల వ్యయంతో ఈ నూతన భవనాన్ని నిర్మించనున్నారు.ఈ సందర్భంగా సర్పంచ్ చిట్యాల వెంకటయ్య మాట్లాడుతూ గ్రామాల అభివృద్ధికి గ్రామపంచాయతీ భవనాలు ఎంతో అవసరమని, గ్రామస్థులకు ప్రభుత్వ సేవలు అందించడంతో పాటు ప్రజా సమస్యల పరిష్కారానికి పంచాయతీ భవనం కేంద్రంగా నిలుస్తుందని అన్నారు. గ్రామపంచాయతీల బలోపేతంతోనే గ్రామాల సమగ్ర అభివృద్ధి సాధ్యమవుతుందని పేర్కొన్నారు.కాంగ్రెస్ ప్రభుత్వం గ్రామీణ ప్రాంతాల అభివృద్ధికి ప్రాధాన్యతనిస్తూ ముందుకు సాగుతోందని, వనపర్తి ఎమ్మెల్యే తూడి మేఘారెడ్డి సహకారంతో నియోజకవర్గంలోని గ్రామాల్లో అభివృద్ధి పనులు చేపడుతున్నామని తెలిపారు. ప్రజలకు ఇచ్చిన ప్రాధాన్యతను నిలబెట్టుకుంటూ గ్రామానికి అవసరమైన మౌలిక సదుపాయాల కల్పనకు నిరంతరం కృషి చేస్తామని అన్నారు.నూతన గ్రామపంచాయతీ భవన నిర్మాణం పూర్తయితే గ్రామ ప్రజలకు మరింత మెరుగైన సేవలు అందుబాటులోకి వస్తాయని, గ్రామ అభివృద్ధికి ఇది ఎంతగానో దోహదపడుతుందని సర్పంచ్ వెంకటయ్య ఆశాభావం వ్యక్తం చేశారు.ఈ కార్యక్రమంలో మండల కాంగ్రెస్ నాయకులు, పార్టీ కార్యకర్తలు, గ్రామ పెద్దలు, స్థానిక ప్రజాప్రతినిధులు, గ్రామస్థులు పాల్గొన్నారు. ఈ కార్యక్రమంలో కాంగ్రెస్ పార్టీ జిల్లా కార్యదర్శి ఐ సత్యారెడ్డి, మండల కాంగ్రెస్ పార్టీ అధ్యక్షులు కొమ్ము వెంకటస్వామి, కాంగ్రెస్ సీనియర్ నాయకులు గట్టు యాదవ్, ఉప సర్పంచ్, వార్డు సభ్యులు, పంచాయతీ కార్యదర్శి పాల్గొన్నారు.


Comments