ఘట్కేసర్, మార్చి 1 (తెలంగాణ ముచ్చట్లు):
మేడ్చల్ మల్కాజిగిరి జిల్లా ఘట్కేసర్ మండల కేంద్రంలో లాల్ బహాదుర్ స్మారక యువజన సంఘం నూతన భవనాన్ని ఆదివారం ఘనంగా ప్రారంభించారు. ఈ కార్యక్రమానికి మల్కాజ్గిరి పార్లమెంట్ సభ్యులు ఈటల రాజేందర్ ముఖ్య అతిథిగా హాజరై రిబ్బన్ కట్ చేసి భవనాన్ని ప్రారంభించారు.ఈ సందర్భంగా ఎంపీ ఈటల రాజేందర్ మాట్లాడుతూ యువజన సంఘాలు సమాజ నిర్మాణంలో కీలక పాత్ర పోషించాలని సూచించారు. యువతలో సేవాభావం, నాయకత్వ లక్షణాలు పెంపొందించేందుకు ఇటువంటి సంఘ భవనాలు వేదికలుగా నిలవాలని అన్నారు. గ్రామీణ ప్రాంతాల్లో యువతకు అవసరమైన సదుపాయాలు కల్పించడం ద్వారా సామాజిక అభివృద్ధి సాధ్యమవుతుందని పేర్కొన్నారు.సంఘం ప్రతినిధులు మాట్లాడుతూ సభ్యుల సహకారంతో భవన నిర్మాణం పూర్తి చేసినట్లు తెలిపారు. భవనంలో విద్యా, క్రీడా, సాంస్కృతిక మరియు సేవా కార్యక్రమాలు నిర్వహించనున్నట్లు వెల్లడించారు. ఈ సందర్భంగా దాతలను సంఘం తరఫున సన్మానించారు.కార్యక్రమంలో స్థానిక ప్రజాప్రతినిధులు, యువజన సంఘ సభ్యులు, గ్రామ పెద్దలు మరియు పెద్ద సంఖ్యలో ప్రజలు పాల్గొన్నారు.
Comments