జిల్లా ఉత్తమ ఉపాధ్యాయుడిగా లక్ష్మణస్వామి.

జగిత్యాల, సెప్టెంబర్ 5(తెలంగాణ ముచ్చట్లు ):

ఉపాధ్యాయ దినోత్సవాన్ని పురస్కరించుకుని జగిత్యాల జిల్లా కలెక్టరేట్‌లో ఘనంగా నిర్వహించిన వేడుకల్లో జిల్లా ఉత్తమ ఉపాధ్యాయ అవార్డులను ప్రదానం చేశారు. ఈ సందర్భంగా శంకరపట్నం మండలం తాడికల్ గ్రామానికి చెందిన వోడ్నాల లక్ష్మణస్వామి జిల్లా ఉత్తమ ఉపాధ్యాయుడిగా ఎంపికై అవార్డును అందుకున్నారు.
నిరుపేద పద్మశాలి కుటుంబంలో జన్మించిన లక్ష్మణస్వామి చిన్ననాటి నుంచే చదువులో ప్రతిభ కనబరుస్తూ క్లాస్ ఫస్ట్‌గా నిలిచేవారు. కుటుంబ ఆర్థిక పరిస్థితులు అనుకూలంగా లేకపోయినా పట్టుదలతో చదువును కొనసాగించి ఉపాధ్యాయ వృత్తిని ఎంచుకున్నారు. ఎన్నో కష్టాలను అధిగమించి ఉన్నత స్థాయికి ఎదిగిన ఆయన, తన వృత్తి జీవితంలో విద్యార్థుల భవిష్యత్తుకు ప్రాధాన్యత ఇస్తూ ముందుకు సాగుతున్నారు.
గత 24 సంవత్సరాలుగా ఉపాధ్యాయుడిగా సేవలందిస్తున్న లక్ష్మణస్వామి క్రమశిక్షణ, అంకితభావంతో విద్యాబోధన చేస్తూ విద్యార్థులలో విద్యా నైపుణ్యాలతో పాటు మంచి విలువలను పెంపొందించేందుకు కృషి చేస్తున్నారు. ఆయన సేవలను గుర్తించిన విద్యాశాఖ జిల్లా స్థాయిలో ఉత్తమ ఉపాధ్యాయ అవార్డుకు ఎంపిక చేసింది.
జిల్లా కలెక్టరేట్‌లో జరిగిన కార్యక్రమంలో జగిత్యాల ఎమ్మెల్యే డా. సంజయ్ కుమార్, అడిషనల్ కలెక్టర్, జిల్లా విద్యాధికారి (DEO) చేతుల మీదుగా లక్ష్మణస్వామికి అవార్డు, ప్రశంసా పత్రం అందజేశారు. ఈ సందర్భంగా ఎమ్మెల్యే మాట్లాడుతూ నిరుపేద కుటుంబం నుంచి వచ్చి 24 ఏళ్లుగా నిబద్ధతతో ఉపాధ్యాయ వృత్తిలో కొనసాగుతున్న లక్ష్మణస్వామి సేవలు అభినందనీయమన్నారు. యువ ఉపాధ్యాయులకు ఆయన స్ఫూర్తిగా నిలుస్తున్నారని కొనియాడారు.
అడిషనల్ కలెక్టర్, జిల్లా విద్యాధికారి కూడా లక్ష్మణస్వామి విద్యారంగానికి అందిస్తున్న సేవలను అభినందించారు. తన సేవలకు గుర్తింపుగా జిల్లా ఉత్తమ ఉపాధ్యాయ అవార్డు లభించడంపై లక్ష్మణస్వామి సంతోషం వ్యక్తం చేశారు. ఈ అవార్డు తన బాధ్యతను మరింత పెంచిందని, భవిష్యత్తులోనూ విద్యార్థుల అభ్యున్నతికి మరింత కృషి చేస్తానని తెలిపారు.
తాడికల్ గ్రామానికి చెందిన వ్యక్తి జిల్లా స్థాయి ఉత్తమ ఉపాధ్యాయ అవార్డు అందుకోవడంతో గ్రామస్తులు, పద్మశాలి సంఘం నాయకులు, సహచర ఉపాధ్యాయులు, విద్యార్థులు హర్షం వ్యక్తం చేశారు. నిరుపేద కుటుంబం నుంచి ప్రారంభమైన లక్ష్మణస్వామి ప్రస్థానం 24 ఏళ్ల అంకితభావంతో జిల్లా ఉత్తమ ఉపాధ్యాయుడి స్థాయికి చేరడం పలువురికి ఆదర్శంగా నిలిచింది.