భక్తి, సేవ, అభివృద్ధి దిశగా సూరారం గ్రామం.

ఎల్కతుర్తి, జూన్ 4( తెలంగాణ ముచ్చట్లు):

హన్మకొండ జిల్లా ఎల్కతుర్తి మండలం సూరారం గ్రామం భక్తి, సేవ, అభివృద్ధి దిశగా ముందుకు సాగుతోంది. గ్రామంలో నిర్మాణంలో ఉన్న శ్రీ కోదండ రామాలయం మరియు ధన్వంతరి మల్టీపర్పస్ హాల్ నిర్మాణ కార్యక్రమాలు సామాజిక, ఆధ్యాత్మిక అభివృద్ధికి కేంద్రబిందువులుగా నిలుస్తున్నాయి.
ఈ నేపథ్యంలో తంగెడా ఫౌండేషన్ వ్యవస్థాపకులు డాక్టర్ తంగెడా ప్రేమానందరావు మహారాష్ట్ర మాజీ గవర్నర్ చెన్నమనేని విద్యాసాగర్ రావును హైదరాబాద్‌లోని ఆయన నివాసంలో మర్యాదపూర్వకంగా కలిశారు. సూరారం గ్రామంలో కొనసాగుతున్న ఆలయ నిర్మాణం, సేవా కార్యక్రమాల పురోగతిని ఆయనకు వివరించారు.
గ్రామ ప్రజల ఆధ్యాత్మిక అవసరాలతో పాటు సామాజిక కార్యక్రమాలకు ఉపయోగపడే విధంగా నిర్మిస్తున్న శ్రీ కోదండ రామాలయం, ధన్వంతరి మల్టీపర్పస్ హాల్‌ల ప్రాముఖ్యతను వివరించారు. ఈ నిర్మాణాలు పూర్తయితే గ్రామ ప్రజలకు మరింత ఉపయోగకరంగా మారనున్నాయని తెలిపారు.
అలాగే నిర్మాణంలో ఉన్న ఈ ప్రాజెక్టులను ప్రత్యక్షంగా సందర్శించాలని మాజీ గవర్నర్‌ను ఆహ్వానించగా, ఆయన సానుకూలంగా స్పందించి త్వరలో సూరారం గ్రామాన్ని సందర్శించేందుకు అంగీకరించారు.
ఈ సందర్భంగా కోదండ రామాలయ నిర్మాణ సేవా సమర్పణ బృందం, తంగెడా ఫౌండేషన్ సభ్యులు, ఆలయ భక్తులు మాజీ గవర్నర్ విద్యాసాగర్ రావుకు కృతజ్ఞతలు తెలిపారు. సూరారం గ్రామంలో జరుగుతున్న ఆధ్యాత్మిక, సామాజిక సేవా కార్యక్రమాలకు ఆయన అందించిన ప్రోత్సాహం గ్రామ ప్రజల్లో మరింత ఉత్సాహాన్ని నింపిందని పేర్కొన్నారు. గ్రామాభివృద్ధి కోసం చేపడుతున్న సేవా కార్యక్రమాలు మరింత విస్తరించాలని ఆకాంక్షించారు.