అశ్వారావుపేట నియోజకవర్గంలో మంత్రి పొంగులేటి, ఎంపీ రఘురాం రెడ్డి విస్తృత పర్యటన

ఉమ్మడి ఖమ్మం బ్యూరో చీఫ్ తెలంగాణ ముచ్చట్లు :

 రాష్ట్ర రెవెన్యూ, గృహ నిర్మాణం, సమాచార శాఖల మంత్రి పొంగులేటి శ్రీనివాసరెడ్డి, ఖమ్మం ఎంపీ రామ సహాయం రఘురాం రెడ్డి మంగళవారం అశ్వారావుపేట నియోజకవర్గం లో ముమ్మరంగా పర్యటించారు. తొలుత ములకలపల్లి మండలం మంగపేటలో ప్రాథమిక ఆరోగ్య కేంద్రం నూతన భవనాన్ని ఎంపీ రఘురాంరెడ్డి, రాష్ట్ర ఇరిగేషన్ డెవలప్మెంట్ కార్పొరేషన్ చైర్మన్ మువ్వా విజయ బాబుతో కలిసి ప్రారంభించారు. తమ ప్రభుత్వం పేదల ఆరోగ్యo కోసం.. అధిక ప్రాధాన్యం ఇస్తోందని తెలిపారు. సీజనల్ వ్యాధుల కాలం కావడంతో.. వైద్యులు మరింత అప్రమత్తంగా ఉండీ ప్రజలకు మెరుగైన చికిత్స అందించాలని సూచించారు. అనంతరం వినాయకపురం, నారాయణపురం గ్రామాల్లో నూతన గ్రామ పంచాయతీ కార్యాలయ భవనాలను ప్రారంభించారు.

*లబ్ధిదారులకు సీఎంఆర్ఎఫ్ చెక్కుల పంపిణీ*

అశ్వారావుపేట నియోజకవర్గానికి సంబంధించి 50 మందికి రాష్ట్ర ప్రభుత్వం సీఎంఆర్ఎఫ్ చెక్కులను మంజూరు చేయగా.. ఖమ్మం ఎంపీ రామ సహాయం రఘురాంరెడ్డి లబ్ధిదారులకు అందజేశారు. అశ్వారావుపేటలోని శ్రీ శ్రీ ఫంక్షన్ హాల్ లో.. అధికారులతో సమీక్ష సమావేశం అనంతరం ఈ చెక్కుల పంపిణీ నిర్వహించారు. మొత్తం 50 మంది లబ్ధిదారులకు రూ. 11, 14000 మేరకు లబ్ధి చేకూరిందని తెలిపారు. పేదలందరికీ తమ ప్రభుత్వం అండగా ఉంటుందని అన్నారు.