వంగర గ్రామంలో పారిశుధ్య కార్మికులకు ఘన సన్మానం

భీమదేవరపల్లి, మార్చి 15 (తెలంగాణ ముచ్చట్లు):

గ్రామ పరిశుభ్రత మరియు ప్రజల ఆరోగ్య రక్షణలో కీలక పాత్ర పోషిస్తున్న పారిశుధ్య కార్మికులను గౌరవిస్తూ వంగర గ్రామపంచాయతీ ఆధ్వర్యంలో ఘన సన్మాన కార్యక్రమం నిర్వహించారు. ప్రజా పాలన ప్రగతి ప్రణాళికలో భాగంగా చేపట్టిన 99 రోజుల పరిసరాలు, విద్యాసంస్థల పరిశుభ్రత–పారిశుద్ధ్యం కార్యక్రమం సందర్భంగా ఈ కార్యక్రమం నిర్వహించడం విశేషం.
ఈ సందర్భంగా వంగర గ్రామ సర్పంచ్ గజ్జల సృజన రమేష్ గ్రామపంచాయతీ పాలకవర్గ సభ్యులతో కలిసి గ్రామంలో నిరంతరం పరిశుభ్రత పనులు నిర్వహిస్తూ ప్రజలకు సేవలందిస్తున్న పారిశుధ్య కార్మికులను శాలువాలతో సత్కరించి అభినందించారు. గ్రామాన్ని పరిశుభ్రంగా ఉంచడంలో వారి కృషి ఎంతో విలువైనదని పేర్కొంటూ వారికి కృతజ్ఞతలు తెలిపారు.
సర్పంచ్ గజ్జల సృజన రమేష్ మాట్లాడుతూ గ్రామ పరిశుభ్రత కేవలం ప్రభుత్వ కార్యక్రమం మాత్రమే కాకుండా ప్రతి పౌరుడి బాధ్యత అని అన్నారు. ప్రజలు ఆరోగ్యంగా ఉండాలంటే పరిసరాలు పరిశుభ్రంగా ఉండటం చాలా అవసరమని చెప్పారు. ఈ దిశగా పారిశుధ్య కార్మికులు ప్రతిరోజూ కష్టపడి పనిచేస్తూ గ్రామాన్ని పరిశుభ్రంగా ఉంచడంలో కీలక పాత్ర పోషిస్తున్నారని కొనియాడారు. గ్రామ అభివృద్ధి కార్యక్రమాల్లో పారిశుధ్య కార్మికులకు ఎల్లప్పుడూ ప్రోత్సాహం అందిస్తామని, వారి సేవలను గ్రామ ప్రజలు గుర్తించి గౌరవించాల్సిన అవసరం ఉందని తెలిపారు.
ఈ కార్యక్రమంలో సన్మానితులైన పారిశుధ్య కార్మికులు సమ్మయ్య, రమేష్, కుమారస్వామి, ఐలమ్మ, రజిత, కల్పన, పూర్ణచందర్, విక్రం. వీరంతా గ్రామంలో పరిశుభ్రత కార్యక్రమాలను సమర్థంగా నిర్వహిస్తూ ప్రజల ప్రశంసలు పొందుతున్నారు.
కార్యక్రమంలో ఉప సర్పంచ్ వల్లాల రమేష్, వార్డ్ సభ్యులు శ్రీరామోజు మొండయ్య, బత్తిని రజిత, మారం సతీష్, కాల్వ అంజలి, ఖండే శారద, మిడిదొడ్డి తిరుపతి, వేముల సాధన, రఘునాకుల మహేష్ రెడ్డి, గజ్జల రమేష్ తదితరులు పాల్గొన్నారు. గ్రామ పరిశుభ్రత కోసం అందరూ కలిసి పనిచేయాలని వారు ఈ సందర్భంగా పిలుపునిచ్చారు.
ఈ సన్మాన కార్యక్రమం ద్వారా పారిశుధ్య కార్మికుల సేవలకు గ్రామస్థులు కృతజ్ఞతలు తెలుపుతూ వారిని ప్రోత్సహించారు. గ్రామాన్ని శుభ్రంగా, ఆరోగ్యవంతంగా ఉంచే దిశగా ఈ కార్యక్రమం మంచి సందేశాన్ని అందించింది.