ఎన్‌ఎస్‌యూఐ, విద్యార్థి సంఘాల పిలుపుతో వెల్టూర్‌లో పాఠశాలల బంద్.

పెద్దమందడి,జూలై24(తెలంగాణ ముచ్చట్లు):

నీట్ ప్రశ్నాపత్రం లీకేజీ వ్యవహారంపై ఢిల్లీలోని జంతర్‌మంతర్ వద్ద విద్యార్థులు చేపట్టిన నిరసనలకు మద్దతు తెలిపిన లోక్‌సభ ప్రతిపక్ష నాయకుడు రాహుల్ గాంధీని పోలీసులు అరెస్టు చేశారని కాంగ్రెస్ పార్టీ ఆరోపించింది. ఈ అరెస్టును నిరసిస్తూ ఎన్‌ఎస్‌యూఐ, కాంగ్రెస్ పార్టీతో పాటు వివిధ విద్యార్థి సంఘాలు రాష్ట్రవ్యాప్తంగా బంద్‌కు పిలుపునిచ్చాయి.ఈ పిలుపు మేరకు వనపర్తి జిల్లా పెద్దమందడి మండలం వెల్టూర్ గ్రామంలో కాంగ్రెస్ పార్టీ నాయకులు ప్రభుత్వ పాఠశాలలను బంద్ చేయించి కేంద్ర ప్రభుత్వానికి వ్యతిరేకంగా నిరసన చేపట్టారు.ఈ సందర్భంగా కాంగ్రెస్ నాయకుడు మల్లికార్జున్ మాట్లాడుతూ, నీట్ ప్రశ్నాపత్రం లీకేజీతో లక్షలాది మంది విద్యార్థుల భవిష్యత్తు ప్రశ్నార్థకంగా మారిందన్నారు. పరీక్షల నిర్వహణలో జరిగిన లోపాలపై సమాధానం చెప్పాల్సిన కేంద్ర ప్రభుత్వం, విద్యార్థులకు అండగా నిలిచిన ప్రతిపక్ష నాయకుడిని అరెస్టు చేయడం ప్రజాస్వామ్య విలువలకు విరుద్ధమని విమర్శించారు.నీట్ లీకేజీ ఘటనపై నిష్పక్షపాతంగా సమగ్ర విచారణ జరిపి బాధ్యులపై కఠిన చర్యలు తీసుకోవాలని, విద్యార్థులకు న్యాయం చేయాలని వారు డిమాండ్ చేశారు. విద్యార్థుల న్యాయమైన డిమాండ్లను అణచివేసే చర్యలను కేంద్ర ప్రభుత్వం వెంటనే విరమించుకోవాలని హెచ్చరించారు.ఈ కార్యక్రమంలో వెల్టూర్ గ్రామ మాజీ ఉపసర్పంచ్ మల్లికార్జున్, వార్డు సభ్యులు నాగభూషణ్, మద్దూర్ వెంకటయ్య, కావాలి రాజు, గుండెల ఆంజనేయులు, శ్రీను సాగర్‌తో పాటు కాంగ్రెస్ పార్టీ నాయకులు, కార్యకర్తలు పాల్గొన్నారు.