విద్యార్థులపై హింస అమానుషం: ఎమ్మెల్యే రాగమయి.

- నీట్ పేపర్ లీకేజీకి నిరసనగా సత్తుపల్లిలో భారీ ర్యాలీ.
- వేలాది మంది విద్యార్థులతో కాంగ్రెస్ ఆందోళన.. కేంద్రంపై విమర్శలు.

సత్తుపల్లి, జూలై 22 (తెలంగాణ ముచ్చట్లు): 

నీట్ పేపర్ లీకేజీ ఘటనతో పాటు విద్యార్థులపై జరిగిన పోలీసు చర్యలకు నిరసనగా కాంగ్రెస్ పార్టీ ఆధ్వర్యంలో సత్తుపల్లిలో బుధవారం భారీ నిరసన ర్యాలీ నిర్వహించారు. ఏఐసీసీ, టీపీసీసీ పిలుపు మేరకు ఎమ్మెల్యే మట్టా రాగమయి, రాష్ట్ర కాంగ్రెస్ నాయకులు డాక్టర్ మట్టా దయానంద్ నాయకత్వంలో చేపట్టిన ఈ కార్యక్రమంలో వేలాది మంది విద్యార్థులు, కాంగ్రెస్ నాయకులు, కార్యకర్తలు పాల్గొన్నారు. పట్టణంలోని జె.వి.ఆర్ డిగ్రీ కళాశాల నుంచి ప్రారంభమైన ర్యాలీ ప్రధాన వీధుల గుండా అంబేద్కర్ విగ్రహం వరకు సాగింది. ఈ సందర్భంగా అంబేద్కర్ విగ్రహానికి పూలమాలలు వేసి నివాళులర్పించిన అనంతరం కేంద్ర ప్రభుత్వానికి వ్యతిరేకంగా నినాదాలు చేశారు. నీట్ పేపర్ లీకేజీతో విద్యార్థుల భవిష్యత్తు ప్రశ్నార్థకంగా మారిందని, దీనికి బాధ్యులపై కఠిన చర్యలు తీసుకోవాలని డిమాండ్ చేశారు. ఈ సందర్భంగా ఎమ్మెల్యే మాట్లాడుతూ, తమ భవిష్యత్తు కోసం శాంతియుతంగా నిరసన తెలుపుతున్న విద్యార్థులపై బలప్రయోగం చేయడం బాధాకరమన్నారు. విద్యార్థులపై జరిగిన హింసాత్మక ఘటనల దృశ్యాలు చూసి తాను తీవ్రంగా కలత చెందానని, ప్రజాస్వామ్యంలో భిన్నాభిప్రాయాలను అణచివేయడం సరైన విధానం కాదని పేర్కొన్నారు. విద్యార్థుల సమస్యలను పరిష్కరించాల్సిన కేంద్ర ప్రభుత్వం వారిపైనే కఠిన చర్యలకు దిగడం దురదృష్టకరమని విమర్శించారు. నీట్ పేపర్ లీకేజీ వ్యవహారంపై సమగ్ర విచారణ జరిపి బాధ్యులను శిక్షించాలని, విద్యార్థుల భవిష్యత్తుతో చెలగాటం ఆడే ఘటనలు పునరావృతం కాకుండా చర్యలు తీసుకోవాలని కోరారు. ప్రజాస్వామ్య హక్కులను పరిరక్షించడం ప్రతి ప్రభుత్వ బాధ్యత అని, కాంగ్రెస్ పార్టీ ఎల్లప్పుడూ ప్రజల పక్షాన నిలుస్తుందని స్పష్టం చేశారు. విద్య, ఉపాధి, ఉద్యోగాలకు సంబంధించిన అంశాల్లో యువతకు న్యాయం జరిగేలా కేంద్ర ప్రభుత్వం తక్షణ చర్యలు చేపట్టాలని డిమాండ్ చేశారు. విద్యార్థులు అధైర్యపడవద్దని, వారి న్యాయమైన పోరాటానికి కాంగ్రెస్ పార్టీ పూర్తి మద్దతు ఉంటుందని తెలిపారు. కార్యక్రమంలో మున్సిపల్ చైర్‌పర్సన్ రెహానా కమల్, వైస్ చైర్‌పర్సన్ బొంతు సుమలత, వ్యవసాయ మార్కెట్ కమిటీ చైర్మన్ దోమ ఆనంద్ బాబు, గాదె చెన్నారావు, గొర్లమారి రామ్మోహన్ రెడ్డి, తోట సుజలారాణి, బుక్కా కృష్ణవేణి, మండల కాంగ్రెస్ పార్టీ అధ్యక్షులు, కౌన్సిలర్లు, పార్టీ నాయకులు, కార్యకర్తలు, విద్యార్థులు పెద్ద సంఖ్యలో పాల్గొన్నారు.