సత్తుపల్లి, మార్చి 30 (తెలంగాణ ముచ్చట్లు):
తెలంగాణ రాష్ట్ర బడ్జెట్పై రాష్ట్రవ్యాప్తంగా రాజకీయ పార్టీలు, బీసీ సంఘాలు తీవ్ర విమర్శలు వ్యక్తం చేస్తున్నాయి. బీసీ జేఏసీ తెలంగాణ కో-కన్వీనర్ నూనె హరిబాబు యాదవ్ ఈ విషయాన్ని వెల్లడించారు. ఇటీవల అసెంబ్లీ సమావేశాల్లో ప్రతిపక్ష నాయకులు బడ్జెట్పై గట్టి అభ్యంతరాలు వ్యక్తం చేశారు. మాజీ మంత్రి హరీష్ రావు మాట్లాడుతూ బడ్జెట్ వాస్తవ పరిస్థితులకు దూరంగా ఉందని, సంక్షేమ పథకాలలో కోతలు పెట్టారని విమర్శించారు. రాష్ట్ర ఆర్థిక పరిస్థితిని దెబ్బతీసే విధంగా బడ్జెట్ రూపొందించబడిందని ఆయన పేర్కొన్నారు. బీసీలకు సంబంధించిన సబ్ ప్లాన్ నిధులపై స్పష్టత లేకపోవడాన్ని ప్రతిపక్షం ఎత్తిచూపింది. బీసీలకు తగిన కేటాయింపులు లేవని ఆందోళన వ్యక్తం చేస్తూ అసెంబ్లీలో వాకౌట్ చేసిన ఘటనలు కూడా చోటుచేసుకున్నాయి. బీజేపీ నాయకులు ఈ బడ్జెట్ను “పేపర్ బడ్జెట్”గా అభివర్ణిస్తూ, బీసీ, ఎస్సీ, ఎస్టీ సంక్షేమానికి కేటాయింపులు తగ్గించారని ఆరోపించారు. కేటాయించిన నిధులను కూడా పూర్తిగా వినియోగించడంలో ప్రభుత్వం విఫలమవుతోందని విమర్శించారు. అయితే ప్రభుత్వం మాత్రం బీసీల సంక్షేమానికి ప్రాధాన్యం ఇస్తున్నామని, గురుకులాలు, విద్యా కార్యక్రమాలు, సంక్షేమ పథకాల ద్వారా అభివృద్ధికి కట్టుబడి ఉన్నామని స్పష్టం చేస్తోంది. ఇదిలా ఉండగా, బీసీ సంఘాలు ఈ బడ్జెట్ బీసీల ఆశలను నెరవేర్చలేదని, కేవలం ప్రకటనలకే పరిమితమైందని అభిప్రాయపడుతున్నాయి. బీసీలకు ప్రత్యేక బడ్జెట్ కేటాయింపులు పెంచి, హామీల అమలుకు స్పష్టమైన కార్యాచరణ ప్రణాళిక ప్రకటించాలని బీసీ జేఏసీ డిమాండ్ చేసింది. లేకపోతే రాష్ట్రవ్యాప్తంగా ఆందోళనలు చేపడతామని హెచ్చరించింది.
Comments