డ్రగ్స్‌పై ఎల్కతుర్తి పోలీసుల అవగాహన యుద్ధం.

ఎల్కతుర్తి, ఏప్రిల్ 30 (తెలంగాణ ముచ్చట్లు):

హనుమకొండ జిల్లా ఎల్కతుర్తి మండలం గోపాల్‌పూర్ గ్రామంలో డ్రగ్స్ వినియోగంపై అవగాహన కల్పించేందుకు ప్రత్యేక సదస్సు నిర్వహించారు. ఈ కార్యక్రమం ఎల్కతుర్తి పోలీసుల ఆధ్వర్యంలో జరిగింది. గ్రామ యువత, తల్లిదండ్రులు, స్థానిక ప్రజలు పెద్ద సంఖ్యలో పాల్గొన్నారు.

ఈ సందర్భంగా ఎల్కతుర్తి ఎస్ఐ నరసింహారావు మాట్లాడుతూ యువత డ్రగ్స్, మత్తు పానీయాలకు పూర్తిగా దూరంగా ఉండాలని సూచించారు. డ్రగ్స్ వల్ల ఆరోగ్య సమస్యలే కాకుండా భవిష్యత్తు పూర్తిగా నాశనం అవుతుందని హెచ్చరించారు. తల్లిదండ్రులు తమ పిల్లల ప్రవర్తనపై ఎప్పటికప్పుడు నిఘా ఉంచి, చెడు అలవాట్లకు దూరంగా ఉండేలా మార్గనిర్దేశం చేయాలని సూచించారు.

యువత లక్ష్యాలు పెట్టుకుని క్రమశిక్షణతో ముందుకు సాగాలని, చెడు స్నేహాలు, మత్తు పదార్థాల వైపు వెళ్లకుండా జాగ్రత్తపడాలని తెలిపారు. డ్రగ్స్‌కు బానిసైతే కుటుంబం, చదువు, ఉద్యోగం వంటి అన్ని అవకాశాలు కోల్పోయే ప్రమాదం ఉందని పేర్కొన్నారు.

అలాగే గ్రామాల్లో ఎవరైనా డ్రగ్స్ విక్రయాలు లేదా వినియోగం చేస్తున్నట్లు సమాచారం ఉంటే వెంటనే పోలీసులకు తెలియజేయాలని కోరారు. సమాజం మొత్తం కలిసి డ్రగ్స్ నిర్మూలనకు కృషి చేయాలని పిలుపునిచ్చారు.

ఈ కార్యక్రమంలో గ్రామ సర్పంచ్ కర్రే లక్ష్మి బిక్షపతి మాట్లాడుతూ గ్రామంలో యువత చెడు అలవాట్లకు దూరంగా ఉండేలా అందరూ కలిసికట్టుగా పనిచేయాలని తెలిపారు. ఉప సర్పంచ్ మారుపాక సందీప్ కూడా ఇలాంటి అవగాహన కార్యక్రమాలను మరింతగా నిర్వహిస్తూ యువతను సన్మార్గంలో నడిపించే ప్రయత్నం చేస్తామని పేర్కొన్నారు.

వార్డ్ సభ్యులు మరియు గ్రామ పెద్దలు మాట్లాడుతూ తల్లిదండ్రులు తమ పిల్లలపై ప్రత్యేక శ్రద్ధ వహించి, వారి ప్రవర్తనను గమనిస్తూ ఉండాలని సూచించారు. గ్రామంలో ఎవరైనా అనుమానాస్పదంగా మత్తు పదార్థాలు వినియోగిస్తున్నా లేదా విక్రయిస్తున్నా వెంటనే పోలీసులకు సమాచారం అందించాలని కోరారు.

కార్యక్రమంలో గ్రామ సర్పంచ్ కర్రే లక్ష్మి బిక్షపతి, ఉప సర్పంచ్ మారుపాక సందీప్, వార్డ్ సభ్యులు లావణ్య, స్వప్న, బిక్షపతి, రత్నాకర్ రావు, రాజేశ్వరరావు, ప్రభాకర్ రావు, చిరురాల రాజమౌగిలి, సుధాకర్, సుభాష్, సమ్మయ్య, రాజేందర్, మనోజ్, మానికిరణ్, ఎల్తూరి రాజేందర్ తదితరులు పాల్గొన్నారు.

చివరగా యువత డ్రగ్స్‌కు దూరంగా ఉండాలని ప్రతిజ్ఞ చేయగా, గ్రామ ప్రజలు ఈ అవగాహన సదస్సును అభినందిస్తూ ఇటువంటి కార్యక్రమాలు తరచూ నిర్వహించాలని కోరారు. IMG-20260430-WA0114