పట్టభద్రులారా.. మీ ఓటే ప్రజాస్వామ్యానికి బలం!

కాంగ్రెస్ ప్రభుత్వ పాలనపై ఓటు ద్వారా మీ గళం వినిపించండి

అర్హులైన ప్రతి పట్టభద్రుడు ఓటరుగా నమోదు కావాలి 

– బీఆర్ఎస్ నాయకుడు కొల్లూరి సామ్రాట్ పిలుపు

కరుణాపురం,నవంబర్04 (తెలంగాణ ముచ్చట్లు): 

రాబోయే పట్టభద్రుల ఎమ్మెల్సీ ఎన్నికల్లో ప్రజాస్వామ్య శక్తిని చాటేందుకు అర్హులైన ప్రతి పట్టభద్రుడు తమ ఓటు హక్కును తప్పనిసరిగా నమోదు చేసుకోవాలని కరుణాపురం, పెద్దపెండ్యాల గ్రామాల బీఆర్ఎస్ పార్టీ ఎమ్మెల్సీ ఎన్నికల ఇన్‌చార్జి కొల్లూరి సామ్రాట్ పిలుపునిచ్చారు. పట్టభద్రుల ఓటు కేవలం ఒక హక్కు మాత్రమే కాదని, ప్రభుత్వ పాలనపై తమ అభిప్రాయాన్ని, ఆకాంక్షలను వ్యక్తం చేసే శక్తివంతమైన ప్రజాస్వామ్య ఆయుధమని ఆయన పేర్కొన్నారు.

ఈ సందర్భంగా సామ్రాట్ మాట్లాడుతూ.. కాంగ్రెస్ ప్రభుత్వం ఎన్నికల సమయంలో ప్రజలకు ఇచ్చిన హామీలను అమలు చేయడంలో విఫలమైందని విమర్శించారు. ప్రభుత్వ పనితీరుపై పట్టభద్రులు తమ అభిప్రాయాన్ని మాటలకే పరిమితం చేయకుండా, ఓటు రూపంలో స్పష్టంగా తెలియజేయాలని కోరారు. ప్రజాస్వామ్యంలో ప్రతి ఓటుకు విలువ ఉంటుందని, అర్హత ఉన్న ఒక్క పట్టభద్రుడు కూడా ఓటరు నమోదుకు దూరం కాకూడదని అన్నారు.

తెలంగాణ అభివృద్ధిలో కేసీఆర్ పాత్ర మరువలేనిది

ప్రత్యేక తెలంగాణ రాష్ట్ర సాధన ఉద్యమంలో బీఆర్ఎస్ అధినేత, మాజీ ముఖ్యమంత్రి కేసీఆర్ చేసిన అలుపెరుగని పోరాటం, ఆయన నాయకత్వం తెలంగాణ చరిత్రలో చిరస్థాయిగా నిలిచిపోతాయని సామ్రాట్ కొనియాడారు. తెలంగాణ ప్రజల ఆకాంక్షను ఉద్యమ రూపంలో ముందుకు తీసుకెళ్లి ప్రత్యేక రాష్ట్ర సాధనలో కీలక పాత్ర పోషించారని గుర్తుచేశారు.

కేసీఆర్ ముఖ్యమంత్రిగా ఉన్న సమయంలో రైతుబంధు, రైతుబీమా, మిషన్ భగీరథ, కల్యాణలక్ష్మి వంటి పథకాల ద్వారా ప్రజలకు అనేక సంక్షేమ ప్రయోజనాలు అందించారని పేర్కొన్నారు. వ్యవసాయం, సంక్షేమం, అభివృద్ధి రంగాల్లో బీఆర్ఎస్ ప్రభుత్వం చేపట్టిన కార్యక్రమాలను ప్రజలు గుర్తుంచుకోవాలని అన్నారు.

ఓటరు నమోదుపై గ్రామాల్లో విస్తృత అవగాహన కల్పించాలి

కరుణాపురం, పెద్దపెండ్యాల గ్రామాల్లో అర్హులైన పట్టభద్రులందరూ ఎమ్మెల్సీ ఎన్నికల ఓటరు జాబితాలో తమ పేర్లు నమోదు చేసుకోవాలని కొల్లూరి సామ్రాట్ విజ్ఞప్తి చేశారు. పార్టీ నాయకులు, కార్యకర్తలు ప్రతి పట్టభద్రుడిని కలిసి ఓటరు నమోదు ప్రాముఖ్యతను వివరించాలని, అర్హులైన వారందరూ నమోదు చేసుకునేలా చొరవ చూపాలని సూచించారు.

పట్టభద్రులారా.. మీ ఓటు మీ భవిష్యత్తుకు బాట వేస్తుంది. ప్రజాస్వామ్యంలో మీ గొంతుకను వినిపించేందుకు వచ్చిన అవకాశాన్ని సద్వినియోగం చేసుకోండి. అర్హులైన ప్రతి ఒక్కరూ ఓటరుగా నమోదు చేసుకుని ప్రజాస్వామ్య ప్రక్రియలో భాగస్వాములు కావాలని కొల్లూరి సామ్రాట్ పిలుపునిచ్చారు.