*తెలంగాణ పోరాట చరిత్రలో చెరగని ముద్ర.*,
*హుజూరాబాద్ ప్రాంతానికి తీరని లోటు*
హుజూరాబాద్,నవంబర్ 04(తెలంగాణ ముచ్చట్లు ):
తెలంగాణ ప్రాంతానికి చెందిన ప్రముఖ స్వాతంత్ర్య సమరయోధుడు వేముగంటి శ్యాంప్రసాదరావు (86) మృతి చెందారు. గత కొంతకాలంగా అనారోగ్య సమస్యలతో బాధపడుతున్న ఆయన మంగళవారం ఉదయం బీబీనగర్‌లోని ఎయిమ్స్ ఆసుపత్రిలో చికిత్స పొందుతూ తుదిశ్వాస విడిచారు. ఆయన మృతి వార్తతో ఉమ్మడి కరీంనగర్ జిల్లాతో పాటు తెలంగాణ, ఆంధ్రప్రదేశ్ రాష్ట్రాల్లోని రాజకీయ, సామాజిక రంగాలకు చెందిన ప్రముఖులు తీవ్ర దిగ్భ్రాంతి వ్యక్తం చేశారు.
నిజాం వ్యతిరేక పోరాటంలో కీలక పాత్ర..
పర్వేద గ్రామానికి చెందిన వేముగంటి శ్యాంప్రసాదరావు చిన్నతనం నుంచే పోరాట స్ఫూర్తిని అలవర్చుకున్నారు. నిజాం నిరంకుశ పాలనకు వ్యతిరేకంగా సాగిన ఉద్యమాలతో పాటు భారత స్వాతంత్ర్య పోరాటంలో చురుకుగా పాల్గొన్నారు. దేశ స్వాతంత్ర్యం, ప్రజల సంక్షేమం, సమాజ అభ్యున్నతి కోసం తన జీవితాన్ని అంకితం చేసిన ఆయన క్రమశిక్షణ, నిబద్ధత, ఉన్నతమైన విలువలకు ప్రతీకగా నిలిచారు. ఆయన జీవితం నేటి తరానికి స్ఫూర్తిదాయకమని పలువురు పేర్కొన్నారు.
కుటుంబ నేపథ్యం.. ప్రజాసేవలో మనుమడు
శ్యాంప్రసాదరావుకు కుమారుడు వి. మధుకర్ రావు, కుమార్తె రమణి ఉన్నారు. రమణి హుజూరాబాద్‌కు చెందిన ప్రముఖ న్యాయవాది దివంగత ఎల్.వి. రమణారావును వివాహం చేసుకున్నారు. వారి కుమారుడు ఎల్.వి. అర్జున్ ప్రస్తుతం తెలంగాణ రాష్ట్ర యూత్ ఫోర్స్ రాష్ట్ర అధ్యక్షుడిగా కొనసాగుతూ ప్రజా కార్యక్రమాల్లో చురుకుగా పాల్గొంటున్నారు.
ఎల్.వి. అర్జున్‌కు ప్రముఖుల పరామర్శలు..
శ్యాంప్రసాదరావు మరణవార్త తెలుసుకున్న పలువురు ప్రజాప్రతినిధులు, రాజకీయ నాయకులు, ప్రముఖులు ఆయన కుటుంబ సభ్యులకు ప్రగాఢ సానుభూతి తెలిపారు. ముఖ్యంగా మనుమడు ఎల్.వి. అర్జున్‌కు ఫోన్ ద్వారా పరామర్శించి, కుటుంబానికి ధైర్యం చెప్పారు. ఈ కష్ట సమయంలో తాము అండగా ఉంటామని భరోసా కల్పించారు.
నివాళులర్పించిన ప్రముఖులు..
శ్యాంప్రసాదరావు మృతికి సంతాపం తెలిపిన వారిలో మాజీ రాజ్యసభ సభ్యులు కెప్టెన్ వి. లక్ష్మీకాంతారావు, సరోజినీ దేవి, మల్కాజిగిరి ఎంపీ ఈటల రాజేందర్, హుజూరాబాద్ ఎమ్మెల్యే పాడి కౌశిక్ రెడ్డి, తెలంగాణ రాష్ట్ర మాజీ ఇంటెలిజెన్స్ చీఫ్ వి. నవీన్ చంద్, మాజీ ఎమ్మెల్యే వొడితల సతీష్ కుమార్, కాంగ్రెస్ పార్టీ హుజూరాబాద్ నియోజకవర్గ ఇన్‌చార్జి వొడితల ప్రణవ్, మాజీ ఎమ్మెల్యే దాస్యం వినయ్ భాస్కర్, మాజీ ఎమ్మెల్సీ లక్ష్మణరావు, కౌన్సిలర్ కొండ ప్రశాంతి, మురళి మంచికట్ల తదితరులు ఉన్నారు.ఆయన ఆశయాలే మనకు మార్గదర్శకం..స్వాతంత్ర్య సమరయోధుడిగా దేశం కోసం పోరాడిన వేముగంటి శ్యాంప్రసాదరావు మృతి పర్వేద గ్రామానికే కాకుండా హుజూరాబాద్ నియోజకవర్గానికి తీరని లోటని పలువురు ప్రముఖులు పేర్కొన్నారు. దేశం కోసం ఆయన చేసిన సేవలు, పోరాట స్ఫూర్తి భావితరాలకు ఎప్పటికీ గుర్తుండిపోతాయని అన్నారు. ఆయన ఆశయాలను కొనసాగిస్తూ సమాజ సేవలో ముందుకు సాగడమే ఆయనకు అందించే నిజమైన నివాళి అని సంతాపం వ్యక్తం చేశారు.
Comments