సగర ఆత్మగౌరవ భవనానికి రూ.2 కోట్ల నిధులు మంజూరు హర్షణీయం.

వనపర్,నవంబర్05(తెలంగాణ ముచ్చట్లు):

హైదరాబాద్ కోకాపేటలో నిర్మించనున్న సగర ఆత్మగౌరవ భవనానికి రాష్ట్ర ప్రభుత్వం రూ.2 కోట్ల నిధులు మంజూరు చేయడం హర్షణీయమని వనపర్తి జిల్లా సగర సంఘం అధ్యక్షుడు మేడల తిరుపతయ్య సగర అన్నారు. గురువారం రాష్ట్ర బీసీ సంక్షేమ శాఖ మంత్రి పొన్నం ప్రభాకర్, ప్రభుత్వ సలహాదారు వి. హనుమంతరావు, బీసీ సంక్షేమ శాఖ కమిషనర్, సగర ఫెడరేషన్ ఎండీ బాలమాయాదేవి చేతుల మీదుగా నిధుల మంజూరు పత్రాన్ని రాష్ట్ర సగర సంఘం నాయకులు అందుకున్నారని తెలిపారు.ఈ సందర్భంగా తిరుపతయ్య సగర మాట్లాడుతూ.. సగరుల ఆత్మగౌరవానికి ప్రతీకగా నిలిచే ఈ భవన నిర్మాణానికి రూ.2 కోట్లు సరిపోవని, ప్రభుత్వం మరిన్ని నిధులు కేటాయించాలని కోరారు. నిర్మాణ రంగం సగరుల సంప్రదాయ వృత్తి కావడంతో భవన నిర్మాణ బాధ్యతలను సగర సామాజిక వర్గానికి చెందిన కాంట్రాక్టర్లకే అప్పగించాలని రాష్ట్ర అధ్యక్షుడు ఉప్పరి శేఖర్ సగర మంత్రి పొన్నం ప్రభాకర్‌కు విజ్ఞప్తి చేసినట్లు పేర్కొన్నారు.ఈ విజ్ఞప్తులపై మంత్రి సానుకూలంగా స్పందించి, తగిన చర్యలు తీసుకుంటామని హామీ ఇవ్వడం సంతోషకరమన్నారు.సగరుల ఐక్యత, అభివృద్ధి, ఆత్మగౌరవానికి ఈ భవనం ఎంతో దోహదపడుతుందని తెలిపారు. ప్రభుత్వం అదనపు నిధులు మంజూరు చేసి నిర్మాణ పనులను త్వరితగతిన ప్రారంభించాలని కోరారు.ఈ కార్యక్రమంలో రాష్ట్ర సగర సంఘం అధ్యక్షుడు ఉప్పరి శేఖర్ సగర, గౌరవాధ్యక్షుడు ముత్యాల హరికిషన్ సగర, ప్రధాన కార్యదర్శి గౌరక్క సత్యం సగర, వివిధ జిల్లాల అధ్యక్షులు, రాష్ట్ర, జిల్లా స్థాయి నాయకులు, మహిళా సంఘం ప్రతినిధులు పెద్ద సంఖ్యలో పాల్గొన్నారు.