జాతీయ స్థాయి అథ్లెటిక్స్ పోటీలకు గంగారపు ప్రభుదేవ్ ఎంపిక!

ఖమ్మం, నవంబర్ 4 (తెలంగాణ ముచ్చట్లు):

పరుగుపందెంలో అద్భుత ప్రతిభ కనబరిచి గంగారపు ప్రభుదేవ్ జాతీయస్థాయి అథ్లెటిక్స్ పోటీలకు ఎంపికయ్యాడు. ఖమ్మంలోని పోలీస్ పరేడ్ మైదానంలో బుధవారం నిర్వహించిన భారత పాఠశాలల క్రీడా సమాఖ్య రాష్ట్రస్థాయి అండర్‌-17 బాలుర 400 మీటర్ల పరుగుపందెంలో ప్రభుదేవ్ ప్రథమ స్థానం సాధించి సత్తా చాటాడు.ఎమ్మార్పీఎస్ సీనియర్ నాయకుడు గంగారపు శ్రీనివాస్ కుమారుడైన ప్రభుదేవ్ తన అసాధారణ ప్రతిభతో ప్రత్యర్థులను అధిగమించి మొదటి స్థానాన్ని దక్కించుకున్నాడు. ఈ విజయంతో మధ్యప్రదేశ్ రాష్ట్రంలోని శివపురిలో ఈ నెల 12న నిర్వహించనున్న జాతీయస్థాయి పాఠశాలల అథ్లెటిక్స్ పోటీల్లో పాల్గొనేందుకు అర్హత సాధించాడు.

రాష్ట్రస్థాయి పోటీల్లో ప్రథమ స్థానం సాధించి జాతీయస్థాయి పోటీలకు ఎంపిక కావడం పట్ల కుటుంబ సభ్యులు, క్రీడాభిమానులు హర్షం వ్యక్తం చేస్తున్నారు. జాతీయస్థాయిలోనూ ఇదే ప్రతిభను కొనసాగించి పతకం సాధించాలని, రాష్ట్రానికి, తల్లిదండ్రులకు మంచి పేరు తీసుకురావాలని ఆకాంక్షిస్తున్నారు.చిన్న వయసులోనే క్రీడారంగంలో ప్రతిభ చాటుతున్న ప్రభుదేవ్ మరిన్ని విజయాలు సాధించి ఉన్నత శిఖరాలను అధిరోహించాలని పలువురు అభినందనలు తెలియజేస్తున్నారు.