నిత్యావసర ధరల పెరుగుదలపై పాలకుల మౌనం.. ప్రతిపక్షాల నిర్లక్ష్యంపై ప్రజల ఆగ్రహం
ఒకప్పుడు ప్రజల కోసం పోరాడిన వామపక్షాలు ఇప్పుడు ఎందుకు మౌనం వహిస్తున్నాయి?
ధరలపై ఉద్యమాలు కరువు.. సామాన్యుడికి అండగా నిలిచే వారేరీ?
వనపర్తి,నవంబర్04(తెలంగాణ ముచ్చట్లు):
తెలంగాణ రాష్ట్రంలో నిత్యావసర సరుకుల ధరలు రోజురోజుకూ పెరుగుతుండటంతో సామాన్య ప్రజల జీవనం భారంగా మారుతోంది. మార్కెట్‌కు వెళ్లాలంటేనే భయపడే పరిస్థితి నెలకొంది. ఏ వస్తువు కొనాలన్నా ధరలు ఆకాశాన్నంటుతున్నాయి. ముఖ్యంగా ఎండుమిర్చి కిలో దాదాపు రూ.330, పంచదార రూ.60, బియ్యం రకం ఆధారంగా కిలో దాదాపు రూ.100 వరకు పలుకుతుండటంతో పాటు పప్పులు, వంటనూనెల ధరలు కూడా సామాన్యుడికి భారంగా మారుతున్నాయి. ఇక మాంసం ధరలు సైతం సామాన్యుడికి అందనంత ఎత్తుకు చేరుతున్నాయి. చికెన్ కిలో దాదాపు రూ.300, మటన్ కిలో రూ.1,000 వరకు పలుకుతుండటంతో మాంసాహారం కొనాలన్నా మధ్యతరగతి కుటుంబాలు ఒకటికి రెండుసార్లు ఆలోచించాల్సిన పరిస్థితి ఏర్పడింది. కూరగాయల నుంచి కిరాణా సరుకులు, మాంసం వరకు అన్నింటి ధరలు పెరుగుతుండటంతో కుటుంబ బడ్జెట్లు తలకిందులవుతున్నాయి.రోజంతా కష్టపడి పనిచేసి సంపాదించే సామాన్యుడికి వచ్చిన ఆదాయం కనీస కుటుంబ అవసరాలకే సరిపోవడం లేదు. ఇంటి అద్దె, పిల్లల చదువులు, వైద్యం, విద్యుత్ బిల్లులతో పాటు నిత్యావసర సరుకుల ధరలు పెరగడంతో ఏం కొనాలి? ఏం తినాలి? అనే ఆందోళన ప్రతి ఇంట్లో కనిపిస్తోంది. గతంలో కుటుంబానికి సరిపడా సరుకులు కొనుగోలు చేసిన డబ్బుతో ఇప్పుడు కొద్దిపాటి వస్తువులు మాత్రమే కొనగలుగుతున్నామని వినియోగదారులు ఆవేదన వ్యక్తం చేస్తున్నారు. పేద కుటుంబాలు కూరగాయలు, పప్పులు, నూనెల వినియోగాన్ని తగ్గించుకోవాల్సిన పరిస్థితి ఏర్పడుతోంది.నిత్యావసర ధరల నియంత్రణపై ప్రభుత్వం తగిన స్థాయిలో చర్యలు తీసుకోవడం లేదనే విమర్శలు వినిపిస్తున్నాయి. మరోవైపు ప్రజా సమస్యలపై ప్రభుత్వాన్ని నిలదీయాల్సిన ప్రతిపక్ష పార్టీలు సైతం ధరల పెరుగుదల అంశంపై గట్టిగా గళమెత్తకపోవడం ప్రజలను నిరాశకు గురిచేస్తోంది. రాజకీయ విమర్శలు, అధికార పక్షంపై ఆరోపణలకే పరిమితమవుతున్నాయే తప్ప సామాన్యుడి నిత్యజీవిత సమస్యలపై నిరంతర పోరాటాలు కనిపించడం లేదనే అసంతృప్తి వ్యక్తమవుతోంది.ఒకప్పుడు పెట్రోల్, డీజిల్, నిత్యావసర సరుకుల ధరలు ఒక్క రూపాయి, రెండు రూపాయలు పెరిగినా వామపక్ష పార్టీలు ప్రజల తరఫున రోడ్డెక్కి పోరాటాలు చేసేవి. ధరల పెరుగుదలపై నిరసనలు, ఆందోళనలతో ప్రభుత్వాలను ప్రశ్నించేవి. పేదలు, కార్మికులు, కూలీల సమస్యలపై ఉద్యమాలు నిర్వహిస్తూ ప్రజలకు అండగా నిలిచేవి.కానీ కాలక్రమేణా వామపక్ష పార్టీల ఉద్యమాలు కూడా తగ్గుముఖం పట్టాయనే అభిప్రాయాలు వ్యక్తమవుతున్నాయి. గతంలో ప్రజా సమస్యలపై కనిపించిన పోరాట పటిమ ఇప్పుడు ఎందుకు కనిపించడం లేదని ప్రజలు ప్రశ్నిస్తున్నారు. రాజకీయ పార్టీల మధ్య అధికార పోటీలు, రాజకీయ సమీకరణాల నడుమ సామాన్యుడి సమస్యలు వెనుకబడిపోతున్నాయనే ఆవేదన వ్యక్తమవుతోంది. ప్రజల తరఫున నిలబడి ప్రశ్నించే గొంతుకలు తగ్గిపోతే తమ సమస్యలను ఎవరికి చెప్పుకోవాలనే ప్రశ్న సామాన్యుడిని వెంటాడుతోంది.ప్రభుత్వం సంక్షేమ పథకాల అమలుకే పరిమితం కాకుండా నిత్యావసర సరుకుల ధరలను నియంత్రించడంపై ప్రత్యేక దృష్టి సారించాలి. మార్కెట్లపై నిరంతర పర్యవేక్షణ చేపట్టాలి. అక్రమ నిల్వలు, కృత్రిమ కొరత సృష్టించే వారిపై చర్యలు తీసుకోవాలి. అవసరమైన చోట ప్రభుత్వ ఆధ్వర్యంలో తక్కువ ధరల విక్రయ కేంద్రాలు ఏర్పాటు చేసి పేద, మధ్యతరగతి ప్రజలకు ఉపశమనం కల్పించాలి. చికెన్, మటన్ సహా నిత్యావసర ఆహార పదార్థాల ధరలపై కూడా మార్కెట్ పరిస్థితులను పర్యవేక్షించాలి.అదేవిధంగా ప్రతిపక్ష పార్టీలు, వామపక్షాలు ప్రజా సమస్యలను రాజకీయ అంశాలకే పరిమితం చేయకుండా ధరల నియంత్రణ కోసం ప్రభుత్వంపై ఒత్తిడి తీసుకురావాలి. ప్రజల పక్షాన నిలబడి సమస్యల పరిష్కారం కోసం ఉద్యమించాల్సిన అవసరం ఉంది.నిత్యావసర ధరలు ఇలాగే పెరుగుతూ పోతే పేద, మధ్యతరగతి కుటుంబాల జీవన ప్రమాణాలు మరింత దిగజారే ప్రమాదం ఉంది. ఇప్పటికైనా పాలకులు, ప్రతిపక్షాలు రాజకీయ ప్రయోజనాలను పక్కనపెట్టి ప్రజల ఆకలి, ఆర్థిక ఇబ్బందులు, నిత్యావసర సమస్యలపై దృష్టి సారించాలి. సంక్షేమ పథకాలతో పాటు అందుబాటు ధరల్లో సరుకులు లభించేలా చర్యలు తీసుకోవాలి. ప్రజాస్వామ్యంలో ప్రజల కష్టాలను ప్రశ్నించే గొంతుకలు బలంగా వినిపించాలి. లేదంటే సామాన్యుడి కష్టాలను పట్టించుకునే వారే కరువయ్యారనే ప్రజల ఆవేదన మరింత పెరిగే అవకాశం ఉంది.
Comments