ముంచుకొస్తున్న వర్షాకాలం.. ఆందోళనలో గ్రామస్తులు
ప్రత్యేక చొరవ తీసుకోవాలని మంత్రి పొన్నం ప్రభాకర్కు విజ్ఞప్తి
భీమదేవరపల్లి, మే 30 (తెలంగాణ ముచ్చట్లు)
భీమదేవరపల్లి మండలంలోని గట్ల నర్సింగాపూర్ గ్రామంలో గత ఏడాది భారీ వర్షాలకు దెబ్బతిన్న ప్రధాన బ్రిడ్జి పునర్నిర్మాణం ఇప్పటికీ ప్రారంభం కాకపోవడంతో గ్రామస్తులు తీవ్ర ఆందోళన వ్యక్తం చేస్తున్నారు. వర్షాకాలం సమీపిస్తున్న నేపథ్యంలో శాశ్వత వంతెన నిర్మాణ పనులను యుద్ధప్రాతిపదికన చేపట్టాలని వారు ప్రభుత్వాన్ని కోరుతున్నారు.
గత సంవత్సరం సంభవించిన భారీ వరదల కారణంగా గ్రామ శివారులోని ప్రధాన బ్రిడ్జి పూర్తిగా కూలిపోవడంతో గ్రామానికి రాకపోకలు నిలిచిపోయాయి. అనంతరం అధికారులు, ప్రజాప్రతినిధులు స్పందించి తాత్కాలికంగా మట్టితో డైవర్షన్ మార్గాన్ని ఏర్పాటు చేశారు. అప్పటి నుంచి గ్రామ ప్రజలు, రైతులు, విద్యార్థులు అదే మార్గం ద్వారా తీవ్ర ఇబ్బందులు ఎదుర్కొంటూ ప్రయాణిస్తున్నారు.
మరో కొన్ని రోజుల్లో వర్షాకాలం ప్రారంభం కానుండటంతో గ్రామస్తుల్లో ఆందోళన మరింత పెరిగింది. భారీ వర్షాలు కురిస్తే తాత్కాలికంగా ఏర్పాటు చేసిన మట్టి కట్ట కొట్టుకుపోయే ప్రమాదం ఉందని వారు చెబుతున్నారు. అలాంటి పరిస్థితి ఏర్పడితే గ్రామానికి బాహ్య ప్రపంచంతో పూర్తిగా సంబంధాలు తెగిపోయే అవకాశం ఉందని ఆవేదన వ్యక్తం చేస్తున్నారు.
గర్భిణులు, వృద్ధులు అత్యవసర వైద్య సేవల కోసం ఆసుపత్రులకు వెళ్లడంలో, విద్యార్థులు పాఠశాలలకు చేరుకోవడంలో, రైతులు తమ వ్యవసాయ ఉత్పత్తులను మార్కెట్లకు తరలించడంలో తీవ్ర ఇబ్బందులు ఎదుర్కోవాల్సి వస్తుందని గ్రామస్తులు పేర్కొన్నారు.
అందువల్ల బ్రిడ్జి నిర్మాణానికి వెంటనే నిధులు మంజూరు చేసి, పనులను వేగవంతంగా ప్రారంభించేలా రాష్ట్ర మంత్రి పొన్నం ప్రభాకర్ ప్రత్యేక చొరవ తీసుకోవాలని గ్రామ ప్రజలు విజ్ఞప్తి చేస్తున్నారు.
Comments