ప్రసవం సజావుగానే.. ఉదయానికి శిశువు మృతి.

హుజురాబాద్, మే 30 (తెలంగాణ ముచ్చట్లు):

సైదాపూర్ మండలం రాయికల్ గ్రామానికి చెందిన రమ్య అనే గర్భిణి ప్రసవం కోసం హుజూరాబాద్ ఏరియా ఆసుపత్రిలో చేరింది. శుక్రవారం రాత్రి వైద్యులు ఆమెకు సిజేరియన్ శస్త్రచికిత్స నిర్వహించగా, ఆమె ఓ మగ శిశువుకు జన్మనిచ్చింది. ప్రసవ సమయంలో తల్లి, శిశువు ఇద్దరూ ఆరోగ్యంగా ఉన్నట్లు వైద్యులు కుటుంబ సభ్యులకు తెలిపారు.
అయితే శనివారం ఉదయం నిద్రలేచి చూసేసరికి శిశువులో ఎలాంటి కదలికలు కనిపించకపోవడంతో కుటుంబ సభ్యులు ఆందోళనకు గురయ్యారు. వెంటనే వైద్య సిబ్బందికి సమాచారం అందించగా, పరీక్షించిన వైద్యులు శిశువు మృతి చెందినట్లు నిర్ధారించారు.
రాత్రి వరకు క్షేమంగా ఉన్న నవజాత శిశువు ఉదయానికి మృతి చెందడంతో తల్లిదండ్రులు, కుటుంబ సభ్యులు కన్నీరుమున్నీరయ్యారు. ఘటనపై అనుమానాలు వ్యక్తం చేస్తూ ఆసుపత్రి సిబ్బంది నిర్లక్ష్యమే కారణమని ఆరోపించారు.
ఈ ఘటనపై ఆసుపత్రి సూపరింటెండెంట్ డా. నారాయణరెడ్డి స్పందిస్తూ, ప్రసవం సజావుగా జరిగిందని, శిశువు జన్మించిన సమయంలో పూర్తిగా ఆరోగ్యంగానే ఉన్నాడని తెలిపారు. శిశువు మృతికి గల కారణాలను తెలుసుకునేందుకు అంతర్గత విచారణ చేపట్టామని, వార్డులోని సీసీటీవీ ఫుటేజీలను కూడా పరిశీలిస్తున్నామని చెప్పారు.
నవజాత శిశువు మృతి ఘటన స్థానికంగా తీవ్ర చర్చనీయాంశంగా మారింది. పూర్తి స్థాయి విచారణ జరిపి వాస్తవాలు వెలుగులోకి తీసుకురావాలని ప్రజలు కోరుతున్నారు.