గ్రేటర్ వరంగల్ మహానగర అభివృద్ధిపై సమీక్షా సమావేశం

హనుమకొండ,తెలంగాణ ముచ్చట్లు:

కాకతీయ పట్టణాభివృద్ధి సంస్థ కార్యాలయంలో గ్రేటర్ వరంగల్ మహానగర అభివృద్ధి పనులపై సమీక్షా సమావేశం జరిగింది.ఈ సమావేశంలో భద్రకాళి చెరువు పూడికతీత, ప్రధాన రహదారుల విస్తరణ, కూరగాయల మార్కెట్లు, రెండు పడకల ఇళ్ల పంపిణీపై చర్చించారు.

ఈ సమీక్షా సమావేశానికి వరంగల్ పశ్చిమ శాసనసభ్యులు నాయిని రాజేందర్ రెడ్డి, నగర మేయర్ గుండు సుధారాణి, కాకతీయ పట్టణాభివృద్ధి సంస్థ చైర్మన్ ఇనగాల వెంకట్రామ్ రెడ్డి, జిల్లా కలెక్టర్ ప్రవీణ్య, నగర పాలక సంస్థ కమిషనర్ అశ్విని వాకాడే పాల్గొన్నారు.

చెరువు పూడికతీత పనులు వేగవంతం భద్రకాళి చెరువు పూడికతీత పనులను వచ్చే వర్షాకాలానికి పూర్తిచేయాలని నిర్ణయించారు. పూడికలో వచ్చిన మట్టిని రైతులకు అందజేసేలా చర్యలు చేపట్టాలని సూచించారు. చెరువు పునరుద్ధరణకు కావాల్సిన నిధులను ప్రభుత్వం అందజేయనున్నట్లు తెలిపారు.

ప్రధాన రహదారుల విస్తరణ
నగర రవాణా సౌకర్యాల మెరుగుదల కోసం ఐదు ప్రధాన రహదారులను విస్తరించేందుకు ప్రణాళిక రూపొందించారు. ఇందులో సీపీఓ కార్యాలయం నుంచి ఎంజీఎం, హనుమాన్ ఆలయం నుంచి అలంకార్ చౌరస్తా, కాంగ్రెస్ భవనం నుంచి కాకతీయ విశ్వవిద్యాలయం, అంబేద్కర్ చౌరస్తా నుంచి ఉద్యోగుల కాలనీ, కాజీపేట చౌరస్తా నుంచి సోమిడి వరకు రహదారులు విస్తరించనున్నారు.

కూరగాయల మార్కెట్లు
నగర ట్రాఫిక్ సమస్యల తగ్గింపుకు చిరువ్యాపారులను కేంద్రీకరించే ఉద్దేశంతో ప్రత్యేక కూరగాయల, మాంసాహార మార్కెట్లు ఏర్పాటు చేయాలని నిర్ణయించారు.

రెండు పడకల ఇళ్ల పంపిణీ
పశ్చిమ నియోజకవర్గంలో నిర్మించిన రెండు పడకల ఇళ్లను సంక్రాంతికి లబ్ధిదారులకు అందజేయాలని నిర్ణయించారు. ప్రతీ విభాగంలో ప్రత్యేక అధికారులను నియమించి నివేదికలు అందించాలని సూచించారు.

నగరాభివృద్ధి కోసం సమన్వయంతో పనులు పాలక సంస్థలు, ఇరిగేషన్, పట్టణాభివృద్ధి, రహదారుల శాఖల అధికారులతో సమన్వయం కలిగి అభివృద్ధి పనులు వేగవంతం చేయాలని నిర్ణయించారు.