శివానందపురి కాలనీలో కన్నులపండువగా సంక్రాంతి ముగ్గుల పోటీలు

కీసర, జనవరి 12 (తెలంగాణ ముచ్చట్లు):

సంక్రాంతి పర్వదినాన్ని పురస్కరించుకొని కీసర మండల పరిధిలోని శివానందపురి కాలనీలో ఆదివారం ముగ్గుల పోటీలు ఘనంగా నిర్వహించారు. కాలనీ అసోసియేషన్ ఆధ్వర్యంలో జరిగిన ఈ కార్యక్రమానికి మహిళలు పెద్ద సంఖ్యలో హాజరై తమ సృజనాత్మకతను రంగవల్లికల రూపంలో ప్రదర్శించారు.ఈ సందర్భంగా కాలనీ వీధులన్నీ రంగురంగుల ముగ్గులతో అలంకరించబడి పండుగ శోభను సంతరించుకున్నాయి. సంప్రదాయానికి ప్రతీకగా నిలిచే విధంగా మహిళలు వేసిన ఆకర్షణీయమైన ముగ్గులు స్థానికులను విశేషంగా ఆకట్టుకున్నాయి. పండుగ సంస్కృతిని ప్రతిబింబించేలా నిర్వహించిన ఈ పోటీలు సంక్రాంతి వాతావరణాన్ని ముందుగానే తీసుకొచ్చాయి.కాలనీ వాసులు పరస్పరం శుభాకాంక్షలు తెలుపుకుంటూ ఈ సంబరాల్లో ఉత్సాహంగా పాల్గొన్నారు. పోటీల అనంతరం ఉత్తమ ప్రతిభ కనబరిచిన విజేతలకు కాలనీ ప్రెసిడెంట్ బహుమతులు అందజేశారు. ఈ సందర్భంగా ఆయన మాట్లాడుతూ, మన సంప్రదాయాలను కాపాడుకోవడంలో మహిళల పాత్ర ఎంతో కీలకమని, ఇలాంటి సాంస్కృతిక కార్యక్రమాలు కాలనీల్లో ఐక్యతను మరింత బలోపేతం చేస్తాయని అన్నారు.ఈ కార్యక్రమంలో కాలనీ కమిటీ సభ్యులు, మహిళలు, స్థానికులు పెద్ద సంఖ్యలో పాల్గొని కార్యక్రమాన్ని విజయవంతం చేశారు. ముగ్గుల పోటీలతో శివానందపురి కాలనీ సంక్రాంతి సంబరాలతో కళకళలాడింది.