వీరనారాయణపురంలో విషాదం కెనాల్‌లో పడి ఐదేళ్ల బాలుడు మృతి

ఎల్కతుర్తి, జనవరి 31(తెలంగాణ ముచ్చట్లు)

హనుమకొండ జిల్లా ఎల్కతుర్తి మండలం వీరనారాయణపురం గ్రామంలో శుక్రవారం హృదయ విదారక ఘటన చోటుచేసుకుంది. గ్రామానికి చెందిన చదరం ప్రశాంత్ కుమారుడు శశివర్ధన్ (5) ఆడుకుంటూ ప్రమాదవశాత్తు గ్రామ సమీపంలోని చిన్న కెనాల్ (డీబీఎం–23)లో పడిపోయి మృతి చెందాడు.
స్థానికుల కథనం ప్రకారం, ఇంటి సమీపంలో పిల్లలతో కలిసి ఆడుకుంటున్న శశివర్ధన్ అనుకోకుండా కెనాల్‌లో జారిపడ్డాడు. కొంతసేపటి తర్వాత విషయం గమనించిన గ్రామస్తులు వెంటనే కెనాల్‌లోకి దిగి బాలుడిని బయటకు తీసి ప్రాణాలు కాపాడేందుకు ప్రయత్నించారు. అయితే అప్పటికే బాలుడు మృతి చెందినట్లు నిర్ధారణ కావడంతో వారి ప్రయత్నాలు ఫలించలేదు.
ఈ ఘటనతో బాలుడి తల్లిదండ్రులు ప్రశాంత్, కుటుంబ సభ్యులు శోకసంద్రంలో మునిగిపోయారు. చిన్న వయసులోనే కుమారుడిని కోల్పోవడంతో కుటుంబంలో తీరని విషాదం నెలకొంది. విషయం తెలుసుకున్న గ్రామస్తులు పెద్ద సంఖ్యలో బాలుడి ఇంటికి చేరుకుని కుటుంబాన్ని పరామర్శించి ప్రగాఢ సానుభూతి తెలిపారు.
గ్రామానికి సమీపంలో ఉన్న కెనాల్‌కు తగిన రక్షణ చర్యలు, గోడలు లేదా హెచ్చరిక బోర్డులు లేకపోవడమే ఇలాంటి ప్రమాదాలకు కారణమవుతోందని గ్రామస్తులు ఆవేదన వ్యక్తం చేశారు. భవిష్యత్తులో ఇటువంటి ఘటనలు పునరావృతం కాకుండా సంబంధిత అధికారులు తక్షణ చర్యలు తీసుకోవాలని వారు కోరుతున్నారు.
ఈ విషాద ఘటనతో వీరనారాయణపురం గ్రామం మొత్తం శోకవాతావరణంలో మునిగిపోయింది.