సత్తుపల్లి, నవంబరు 6(తెలంగాణ ముచ్చట్లు):
సత్తుపల్లి మండలం బుగ్గపాడు గ్రామంలో నాగేంద్రస్వామి ఆలయం సమీపంలోని మూలమలుపు వద్ద శుక్రవారం అన్నపురెడ్డిపల్లి వైపు నుంచి వేగంగా వచ్చిన లారీ అదుపుతప్పి బోల్తా పడింది. ఈ ప్రమాదంలో లారీ సమీపంలో ఉన్న అదే గ్రామానికి చెందిన చాప నాగలక్ష్మి (60) తీవ్రంగా గాయపడ్డారు. ఆమె ఎడమ కాలు పూర్తిగా విరిగిపోయింది.
ప్రమాద సమాచారం అందుకున్న సత్తుపల్లి 108 అంబులెన్స్ సిబ్బంది ఈఎంటీ (ఎమర్జెన్సీ మెడికల్ టెక్నీషియన్) గొల్లమందల కృష్ణ, పైలట్ కట్టం మహేష్ హుటాహుటిన సంఘటనా స్థలానికి చేరుకున్నారు. బాధితురాలికి అక్కడికక్కడే ప్రాథమిక చికిత్స అందించి, కాలుకు కట్లు కట్టి స్ప్లింటింగ్ చేశారు. అనంతరం అంబులెన్స్‌లో ఆసుపత్రికి తరలించే క్రమంలో సెలైన్ అందిస్తూ, ఆక్సిజన్ ఏర్పాటు చేసి, ధైర్యం చెబుతూ సత్తుపల్లి ప్రభుత్వ ప్రాంతీయ ఆసుపత్రిలో చేర్పించారు. ప్రమాద సమయంలో సకాలంలో స్పందించి బాధితురాలికి వైద్యసేవలు అందించి ఆసుపత్రికి తరలించిన 108 సిబ్బందిని జిల్లా మేనేజర్ ఆలేటి ప్రణయ్ కుమార్, మూడు జిల్లాల ప్రోగ్రాం మేనేజర్ షేక్ నజీరుద్దీన్, బుగ్గపాడు గ్రామస్తులు అభినందించారు
Comments