ఉద్యమకారులకు 250 గజాల ఇంటి స్థలం ఇవ్వాలి.

ఉద్యమకారుల సమస్యలను పరిష్కరించేందుకు ప్రభుత్వం చర్యలు తీసుకోవాలి

– తెలంగాణ ఉద్యమకారుల సంఘం వ్యవస్థాపకుడు డాక్టర్ పిడమర్తి రవి

మహబూబ్‌నగర్, సెప్టెంబర్ 24 (తెలంగాణ ముచ్చట్లు): 

తెలంగాణ రాష్ట్ర సాధన ఉద్యమంలో పాల్గొన్న ఉద్యమకారులకు 250 గజాల ఇంటి స్థలం కల్పించాలని తెలంగాణ ఉద్యమకారుల సంఘం వ్యవస్థాపకుడు డాక్టర్ పిడమర్తి రవి డిమాండ్ చేశారు.పాలమూరు విశ్వవిద్యాలయంలో ప్రత్యేక తెలంగాణ రాష్ట్ర ఉద్యమకారులు నిర్వహించిన సమావేశానికి ఉద్యమకారుల గుర్తింపు కమిటీ సభ్యులు కోదండరాం, రాములు నాయక్, జితేందర్ రెడ్డితో కలిసి పిడమర్తి రవి హాజరయ్యారు. ఈ సందర్భంగా ఆయన మాట్లాడుతూ తెలంగాణ ఉద్యమంలో పాల్గొన్న ప్రతి ఒక్కరినీ గుర్తించి సముచిత గౌరవం కల్పించాలని కోరారు.

ఉద్యమకారులకు 250 గజాల ఇంటి స్థలం, పింఛన్‌, గుర్తింపు కార్డు, ఇతర సంక్షేమ పథకాలు అందించాలనే డిమాండ్లు ఇప్పటికే ప్రభుత్వం దృష్టికి వెళ్లాయి. ఉద్యమకారుల గుర్తింపు కమిటీకి అందిన ప్రతిపాదనల్లో కూడా 250 గజాల ఇంటి స్థలం, పింఛన్‌, ఉచిత బస్సు ప్రయాణం, ఆరోగ్య సదుపాయాలు తదితర అంశాలు ఉన్నట్లు వార్తా నివేదికలు వెల్లడించాయి. ఉద్యమకారులకు ప్రజా ప్రభుత్వం అండగా ఉంటుందని పిడమర్తి రవి ఆశాభావం వ్యక్తం చేశారు. తెలంగాణ ఉద్యమంలో పాల్గొన్న ప్రతి ఒక్కరికీ గుర్తింపు, గౌరవం దక్కేలా ప్రభుత్వం చర్యలు తీసుకోవాలని కోరారు.

ప్రభుత్వం ఉద్యమకారుల సంక్షేమం కోసం ప్రకటించిన హామీలను అమలు చేయాలని, గుర్తింపు ప్రక్రియను వేగవంతం చేయాలని డిమాండ్ చేశారు. ఉద్యమకారుల గుర్తింపు కోసం ప్రభుత్వం ఏర్పాటు చేసిన కమిటీ ఇప్పటికే వివిధ వర్గాలతో సంప్రదింపులు జరిపినట్లు కూడా నివేదికలు పేర్కొంటున్నాయి. ఈ సమావేశంలో మలిదశ తెలంగాణ ఉద్యమకారులు ఎండి అన్వర్, నిజ్జన రమేష్, ఎండి రహీం, బుర్ర సురేష్, గడ్డమీది గోపాలకృష్ణ, బోరెల్లి సురేష్, మిట్ట యాదయ్య, దినేష్, కృష్ణ, పోలే నరేందర్, పాలమూరు విశ్వవిద్యాలయ ఉద్యమకారులు, అప్పటి అధ్యాపకులు తదితరులు పాల్గొన్నారు.