ఇల్లందకుంట, సెప్టెంబర్ 24 (తెలంగాణ ముచ్చట్లు):
పండుగలు మతాలకు అతీతంగా ప్రజలను ఒక్కతాటిపైకి తీసుకువస్తాయనే సందేశాన్ని చాటిచెప్పే ఘటన కరీంనగర్ జిల్లా ఇల్లందకుంట మండలం రాచపల్లి గ్రామంలో చోటుచేసుకుంది. వినాయక నవరాత్రి ఉత్సవాల్లో భాగంగా నిర్వహించిన వినాయకుడి లడ్డూ వేలంలో అదే గ్రామానికి చెందిన ముస్లిం యువకుడు మహమ్మద్ అక్బర్ పాల్గొని రూ.3,116కు లడ్డూను దక్కించుకున్నారు.
వినాయకుడి లడ్డూ వేలంలో అక్బర్ పాల్గొని లడ్డూను దక్కించుకోవడంతో గ్రామంలో మత సామరస్యం, పరస్పర సోదరభావానికి సంబంధించిన చర్చకు దారితీసింది. ఒకరి పండుగల్లో మరొకరు భాగస్వాములవుతూ, మతాల మధ్య పరస్పర గౌరవం, ఐక్యతను కొనసాగించాలనే సందేశాన్ని ఈ సందర్భంగా గ్రామస్తులు వ్యక్తం చేశారు.
రాచపల్లి గ్రామంలో చోటుచేసుకున్న ఈ ఘటనతో గ్రామంలో మతాలకు అతీతంగా సోదరభావం, ఐక్యతతో పండుగలు నిర్వహించుకోవాలనే ఆకాంక్ష వ్యక్తమైంది. లడ్డూ వేలంలో అక్బర్ పాల్గొని దక్కించుకోవడం గ్రామస్తుల దృష్టిని ఆకర్షించింది.
కార్యక్రమంలో ఉపసర్పంచ్ మాజీ లాలు, గ్రామస్తులు పాల్గొన్నారు.
Comments