విమలక్క 50 ఏళ్ల కళా ప్రస్థానానికి 50 గంటల ప్రజా కళా జాతర.

వనపర్తి,సెప్టెంబర్24(తెలంగాణ ముచ్చట్లు):

తెలంగాణ ఉద్యమంలో పాట, ఆట, మాటలతో ప్రజలను చైతన్యపరిచిన ప్రజా గాయని విమలక్క 50 ఏళ్ల కళా ప్రస్థానాన్ని పురస్కరించుకుని నిర్వహిస్తున్న 50 గంటల ప్రజా కళా జాతర పోస్టర్‌ను సాహితీ కళా వేదిక వనపర్తి జిల్లా అధ్యక్షుడు పలుస శంకర్ గౌడ్ బుధవారం వనపర్తిలో విడుదల చేశారు.హైదరాబాద్‌లోని బాగ్‌లింగంపల్లి ఆర్టీసీ కళ్యాణ మండపం, అరుణోదయ నాగన్న ప్రాంగణంలో సెప్టెంబర్ 26, 27, 28 తేదీల్లో ఈ ప్రజా కళా జాతర నిర్వహించనున్నట్లు తెలిపారు.సెప్టెంబర్ 26న ఉదయం 9 గంటలకు సుందరయ్య పార్క్ నుంచి ఆర్టీసీ కళ్యాణ మండపం వరకు డోరేగింపు నిర్వహించి, ఉదయం 9:45 గంటలకు జెండా ఆవిష్కరణతో కార్యక్రమాలను ప్రారంభించనున్నారు.ఈ సందర్భంగా పలుస శంకర్ గౌడ్ మాట్లాడుతూ.. గత 50 ఏళ్లుగా పాట, ఆట, మాటల ద్వారా ప్రజల్లో చైతన్యం నింపుతూ తెలంగాణ ఉద్యమానికి విమలక్క తన కళతో ఊపిరిపోశారని అన్నారు. తెలుగు రాష్ట్రాలతో పాటు మరో ఎనిమిది రాష్ట్రాల నుంచి వందలాది మంది కళాకారులు ఈ 50 గంటల ప్రజా కళా జాతరలో పాల్గొని తమ కళారూపాలను ప్రదర్శించనున్నారని తెలిపారు.అరుణోదయ సాంస్కృతిక సమాఖ్య 52 ఏళ్ల పోరాట చరిత్రను, విమలక్క 50 ఏళ్ల కళా ప్రస్థానాన్ని యువతరానికి తెలియజేయడమే ఈ జాతర ప్రధాన లక్ష్యమని అన్నారు. వనపర్తి జిల్లా నుంచి కళాకారులు, సాహితీవేత్తలు, విద్యార్థులు పెద్ద సంఖ్యలో తరలివచ్చి జాతరను విజయవంతం చేయాలని పిలుపునిచ్చారు.ఈ పోస్టర్ విడుదల కార్యక్రమంలో కవి జనజ్వాలా బైరోజు చంద్రశేఖర్, డాక్టర్ శాం సుందర్, గంధం నాగరాజు, బండారు శ్రీనివాస్, దేశి రాములు, బుచ్చిబాబు, సాహితీ కళా వేదిక నాయకులు, స్థానిక కళాకారులు పాల్గొన్నారు.