హుజురాబాద్, జూలై 16(తెలంగాణ ముచ్చట్లు ):
సమృద్ధిగా వర్షాలు కురిసి పంటలు బాగా పండాలని ఆకాంక్షిస్తూ కరీంనగర్ జిల్లా హుజురాబాద్ పట్టణంలోని 19వ వార్డులో కౌన్సిలర్ గోస్కుల రాజ్కుమార్ ఆధ్వర్యంలో గురువారం సంప్రదాయ కప్పతల్లి ఆట నిర్వహించారు.
ఈ సందర్భంగా ముందుగా గ్రామదేవతలకు జలాభిషేకం చేసి ప్రత్యేక పూజలు నిర్వహించారు. అనంతరం మహిళలు, చిన్నారులు కలిసి ఒక కప్పను ప్రతీకగా అలంకరించి, ఇంటింటికీ తిరుగుతూ వర్షదేవుడిని ప్రార్థించే జానపద గీతాలు ఆలపించారు. గ్రామస్తులు సంప్రదాయం ప్రకారం కప్పపై నీళ్లు పోసి, బియ్యం తదితర ధాన్యాలను దానం చేస్తూ కార్యక్రమానికి తమ వంతు సహకారం అందించారు.
తరువాత సేకరించిన ధాన్యాలతో సామూహికంగా వంట చేసి నైవేద్యం సమర్పించారు. గ్రామ శ్రేయస్సు, రైతుల సంక్షేమం, సమృద్ధిగా వర్షాలు కురిసి పంటలు పుష్కలంగా పండాలని భక్తిశ్రద్ధలతో ప్రార్థించారు.
ఈ కార్యక్రమంలో 19వ వార్డు కౌన్సిలర్ గోస్కుల రాజ్కుమార్తో పాటు పెద్ద సంఖ్యలో మహిళలు, చిన్నారులు, స్థానిక ప్రజలు పాల్గొన్నారు.
Comments