ఉపాధి పనుల్లో భద్రత లేకపోవడంతో కూలీలకు ప్రమాదం.

ఎల్కతుర్తి, ఏప్రిల్ 16( తెలంగాణ ముచ్చట్లు):

హన్మకొండ జిల్లా ఎల్కతుర్తి మండల కేంద్రంలోని సురారం గ్రామంలో గురువారం ఉపాధి హామీ పనులు కొనసాగుతున్న సమయంలో జరిగిన ప్రమాదం కలకలం రేపింది. పనులు చేస్తుండగా నలుగురు కూలీలకు కంటి తీగలు  కుట్టడంతో తీవ్ర అస్వస్థతకు గురయ్యారు.
బాధితుల్లో కోరె అయిలయ్య, ఎంజాల వెంకటయ్యతో పాటు మరికొందరు కూలీలు ఉన్నారు. ఘటనను గమనించిన స్థానికులు వెంటనే స్పందించి 108 అంబులెన్స్‌కు సమాచారం అందించారు. అంబులెన్స్ సిబ్బంది వేగంగా సంఘటన స్థలానికి చేరుకుని ప్రాథమిక చికిత్స అందించి హుజూరాబాద్ ప్రభుత్వ ఆసుపత్రికి తరలించారు. ప్రస్తుతం కూలీల ఆరోగ్య పరిస్థితి స్థిరంగా ఉన్నట్లు వైద్యులు తెలిపారు.
ఈ ఘటనతో గ్రామంలో తీవ్ర ఆందోళన నెలకొంది. ఉపాధి హామీ పనుల్లో భద్రతా ప్రమాణాలు పూర్తిగా లేవని, కార్మికులకు రక్షణ పరికరాలు ఇవ్వకుండా పనులు చేయించడం ప్రభుత్వ నిర్లక్ష్యానికి నిదర్శనమని గ్రామస్తులు మండిపడుతున్నారు.
ప్రతిరోజూ ప్రాణాలను పణంగా పెట్టి పనిచేస్తున్న కూలీలకు కనీస భద్రత కూడా కల్పించకపోవడం బాధాకరమని, ఇలాంటి ఘటనలు పునరావృతం కాకుండా వెంటనే చర్యలు తీసుకోవాలని స్థానికులు డిమాండ్ చేస్తున్నారు.
ఇకపై ఉపాధి పనులు నిర్వహించే ప్రతి ప్రాంతంలో భద్రతా చర్యలు కట్టుదిట్టంగా అమలు చేయాలని, బాధ్యులపై చర్యలు తీసుకోవాలని గ్రామస్తులు అధికారులను హెచ్చరిస్తున్నారు.