కార్పొరేట్ స్థాయి విద్య, పౌష్టిక ఆహారం అందిస్తున్న ప్రజా ప్రభుత్వం

హన్మకొండ,తెలంగాణ ముచ్చట్లు:

వసతి గృహాల విద్యార్థులకు నాణ్యత ప్రమాణమైన విద్య, పౌష్టిక ఆహారం అందించడమే కాంగ్రెస్ ప్రభుత్వం ప్రధాన లక్ష్యమని వరంగల్ పశ్చిమ శాసనసభ్యులు నాయిని రాజేందర్ రెడ్డి అన్నారు. శనివారం, కాజీపేట 63వ డివిజన్ బీసీ బాలుర వసతి గృహం, హంటర్ రోడ్డులోని మైనారిటీ బాలికల వసతి గృహాలను ఆయన సందర్శించారు. ఈ సందర్భంగా, ఆశ్రమ పాఠశాలల్లో పెంచిన 40% డైట్ ఛార్జీల అమలును ప్రారంభించారు.

వసతుల పరంగా భారీ మార్పులు:

వసతి గృహాలలో విద్యార్థులకు అధునాతన వసతులు, సమతుల్య ఆహారం అందించడానికి కాంగ్రెస్ ప్రభుత్వం ప్రత్యేక చర్యలు తీసుకుంటోందని ఎమ్మెల్యే తెలిపారు. గత 16 ఏళ్లుగా కొనసాగుతున్న చార్జీలను 200% పెంచడం ద్వారా విద్యార్థుల అవసరాలను తీర్చడానికి కట్టుబడి ఉందని చెప్పారు. అన్ని వసతి గృహాలు, గురుకులాల్లో విద్యార్థుల వ్యక్తిగత పరిశుభ్రత, పోషకాహార అవసరాలను తీర్చడం కోసం ప్రభుత్వం ప్రత్యేక దృష్టి సారించిందన్నారు.

నూతన ప్రణాళికలు:

ప్రపంచ స్థాయి విద్యా మరియు పాఠ్యేతర మౌలిక వసతుల కల్పనలో యంగ్ ఇండియా ఇంటిగ్రేటెడ్ రెసిడెన్షియల్ స్కూల్స్ కాంప్లెక్స్‌ను ప్రతిపాదించడం, వసతి గృహాలకు ఏకరీతి ఆహార ప్రణాళికను అమలు చేయడం వంటి చర్యలు ప్రారంభమయ్యాయి. ఈ ప్రయత్నాలు భారతదేశంలోనే తొలిసారి చేపట్టినవి అని, తెలంగాణకు ఇది గర్వకారణమని నాయిని పేర్కొన్నారు.

ఆహార నాణ్యతపై దృష్టి:

ఆహార సరఫరా, నిల్వ, వంట విధానాలు, వడ్డింపు వంటి అంశాల్లో నాణ్యత ప్రమాణాలను కచ్చితంగా అమలు చేస్తున్నామని, ఆహారంలో కలుషితం లేకుండా ఫుడ్ పాయిజనింగ్ ప్రమాదాలను నివారించేందుకు ప్రత్యేక చర్యలు తీసుకుంటున్నట్లు ఎమ్మెల్యే వెల్లడించారు.

విద్యార్థులతో భోజనం:

అనంతరం విద్యార్థులతో కలిసి భోజనం చేసిన ఎమ్మెల్యే, వారి సమస్యలను అడిగి తెలుసుకున్నారు. మైనారిటీ విద్యార్థులు, వారి తల్లిదండ్రులతోనూ భేటీ అయ్యారు.
ఈ కార్యక్రమంలో స్థానిక ప్రజాప్రతినిధులు, అధికారులు, విద్యార్థులు, వారి తల్లిదండ్రులు పాల్గొన్నారు.