ఉత్తమ సేవలకు గుర్తింపు.. పోలీసు మిత్రులకు ఘన సన్మానం.

హుజురాబాద్, జూలై 20(తెలంగాణ ముచ్చట్లు ):

ప్రజా భద్రత కోసం అంకితభావంతో విధులు నిర్వహిస్తూ విశిష్ట సేవలు అందించిన హుజురాబాద్ పోలీసు మిత్రులకు లభించిన ఉత్తమ సేవా ప్రశంసా పత్రాల సందర్భంగా ఘన సన్మాన కార్యక్రమం నిర్వహించారు. బీసీ జాతీయ సంక్షేమ సంఘం హుజురాబాద్ నియోజకవర్గ జనరల్ సెక్రటరీ దేవసాని ప్రియదర్శిని ఆధ్వర్యంలో జరిగిన ఈ కార్యక్రమంలో సేవా పురస్కార గ్రహీతలను శాలువాలతో సత్కరించి అభినందనలు తెలిపారు.
ఇటీవల కరీంనగర్ పోలీస్ కమిషనర్ గౌస్ ఆలం చేతుల మీదుగా ఉత్తమ సేవా ప్రశంసా పత్రాలు అందుకున్న బి. అంజలి, కె. రాజేశ్వర్ రావు, జె. మహేందర్, డ్రైవర్ ప్రసాద్లను ఈ సందర్భంగా ప్రత్యేకంగా సన్మానించారు. విధి నిర్వహణలో చూపిన నిబద్ధత, ప్రజల పట్ల సేవాభావం, క్రమశిక్షణకు గుర్తింపుగానే ఈ అవార్డులు లభించాయని దేవసాని ప్రియదర్శిని పేర్కొన్నారు.
ఈ సందర్భంగా ఆమె మాట్లాడుతూ, సమాజంలో శాంతి భద్రతల పరిరక్షణలో పోలీసు సిబ్బంది చేస్తున్న సేవలు అమూల్యమైనవని అన్నారు. ప్రజల సమస్యలను సత్వరమే పరిష్కరిస్తూ, మానవతా దృక్పథంతో విధులు నిర్వర్తించే పోలీసు మిత్రులకు ఇలాంటి గుర్తింపులు రావడం ప్రతి ఒక్కరికీ గర్వకారణమని తెలిపారు. వారి సేవలు యువతకు స్ఫూర్తిదాయకంగా నిలుస్తాయని, మరింత బాధ్యతతో పనిచేసేందుకు ఈ ప్రశంసలు ప్రోత్సాహం కలిగిస్తాయని పేర్కొన్నారు.
సన్మానం అందుకున్న పోలీసు మిత్రులు తమపై చూపిన అభిమానం, గౌరవానికి కృతజ్ఞతలు తెలియజేస్తూ, భవిష్యత్తులోనూ ప్రజలకు మరింత నిబద్ధతతో సేవలందిస్తామని అన్నారు. ప్రజల విశ్వాసాన్ని నిలబెట్టుకునేలా నిజాయితీ, క్రమశిక్షణతో విధులు నిర్వహిస్తామని తెలిపారు.
ఈ కార్యక్రమంలో పలువురు సామాజికవేత్తలు, బీసీ జాతీయ సంక్షేమ సంఘం నాయకులు, స్థానిక ప్రముఖులు, పోలీసు మిత్రులు పాల్గొని సేవా పురస్కార గ్రహీతలను అభినందించి శుభాకాంక్షలు తెలిపారు.