రోడ్డు విస్తరణతో రోడ్డున పడిన చిరు వ్యాపారులు

జీవనోపాధిపై తీవ్ర ప్రభావం

ఎల్కతుర్తి, ఏప్రిల్ 19 (తెలంగాణ ముచ్చట్లు)

ఎల్కతుర్తి మండలంలోని ప్రధాన చౌరస్తా అభివృద్ధి పనులు, రోడ్డు విస్తరణ కార్యక్రమం భాగంగా బస్టాండు పరిసర ప్రాంతాల్లో సంవత్సరాలుగా వ్యాపారం నిర్వహిస్తున్న చిరు వ్యాపారుల డబ్బాలను ఇటీవల అధికారులు తొలగించారు. ఈ చర్యతో అక్కడ జీవనం సాగిస్తున్న పండ్లు, IMG-20260419-WA0378

కూరగాయలు మరియు ఇతర చిన్న వ్యాపారులు ఒక్కసారిగా రోడ్డుపైకి రావాల్సిన పరిస్థితి ఏర్పడింది. తమకు ప్రత్యామ్నాయ ఏర్పాట్లు లేకుండానే డబ్బాలు తొలగించడంతో తీవ్ర ఇబ్బందులు ఎదుర్కొంటున్నామని వారు ఆవేదన వ్యక్తం చేస్తున్నారు.

చాలా సంవత్సరాలుగా అదే ప్రదేశంలో వ్యాపారం చేసుకుంటూ కుటుంబాలను పోషిస్తున్న వ్యాపారులు ఇప్పుడు వర్షాకాలం, ఎండాకాలం వంటి విపరీత వాతావరణ పరిస్థితుల్లో రోడ్డు పక్కన నిలబడి వ్యాపారం చేయాల్సి వస్తోంది. వర్షం పడితే వస్తువులు పాడవుతుండగా, ఎండలో కస్టమర్లు తగ్గిపోవడం వల్ల ఆదాయం భారీగా తగ్గిందని వారు చెబుతున్నారు. రోజువారీ ఆదాయంపైనే ఆధారపడే ఈ చిరు వ్యాపారులకు ఇది తీవ్ర ఆర్థిక ఇబ్బందులను తీసుకొచ్చింది.

రోడ్డు విస్తరణ సమయంలో ప్రభుత్వం తమకు మార్కెట్ కాంప్లెక్స్ ఏర్పాటు చేస్తామని ఇచ్చిన హామీ ఇంకా అమలు కాలేదని వ్యాపారులు ఆగ్రహం వ్యక్తం చేస్తున్నారు.చిన్న పిల్లల చదువు, కుటుంబ ఖర్చులు నిర్వహించడం కష్టంగా మారిందని పలువురు వ్యాపారులు వాపోతున్నారు.

స్థానిక ప్రజలు కూడా ఈ పరిస్థితిపై ఆందోళన వ్యక్తం చేస్తున్నారు. అభివృద్ధి పనులు అవసరమే అయినా, దాని వల్ల చిన్న వ్యాపారుల జీవనోపాధి దెబ్బతినకూడదని వారు అభిప్రాయపడుతున్నారు. వెంటనే అధికారులు స్పందించి, వ్యాపారులకు తగిన స్థలం కేటాయించి, అన్ని సౌకర్యాలతో మార్కెట్ కాంప్లెక్స్ ఏర్పాటు చేయాలని డిమాండ్ చేస్తున్నారు.

ఇప్పటికైనా ప్రభుత్వం ఇచ్చిన హామీని నెరవేర్చాలని, చిరు వ్యాపారుల కష్టాలను దృష్టిలో ఉంచుకొని తక్షణ చర్యలు తీసుకోవాలని వ్యాపారులు మరియు స్థానికులు విజ్ఞప్తి చేస్తున్నారు.