తోవ

సున్నితమైన మనసును
గాయపరిచిన తర్వాత
మనుషులు నిశ్శబ్దమై పోతారు
మాటలు తగ్గి
నవ్వు మసకబారుతుంది
చిన్న విషయాలకు అతి స్పందన
పెద్దవాటికి మౌనం వహించాల్సి వస్తుంది
నమ్మకం రంగు తెగిపోతుంది
రాత్రులు ఎడారి దీపాలవుతాయి
నిద్ర చిన్నదిగా మిగిలిపోతుంది
ఉదయం లేచినా
రోజు మొదలవదు
తాము పూర్తిగా మారిపోయామని
ఒక దినానికి అర్థమవుతుంది
ఆ మార్పును తిరిగి తీసుకురాలేమని తెలుస్తుంది
ఇక్కడే ఉండి
మరో జన్మలోకి ప్రయాణం ప్రారంభమవుతుంది
మనసుకు గాయమైతే
దేహం బూడిదవుతుంది .