108లోనే పుట్టిన పాప తల్లి–శిశువు క్షేమం.

అశ్వరావుపేట, ఏప్రిల్ 24(తెలంగాణ ముచ్చట్లు):

అత్యవసర సమయంలో 108 అంబులెన్స్ సిబ్బంది చాకచక్యంగా వ్యవహరించి గర్భిణికి సురక్షిత ప్రసవం నిర్వహించారు. గుంటిమడుగు గ్రామానికి చెందిన కె. మంగా (22)కు తీవ్ర ప్రసవ నొప్పులు రావడంతో వెంటనే సమాచారం అందుకున్న సిబ్బంది ఘటనాస్థలానికి చేరుకున్నారు. గ్రావిడా-2 గర్భిణిగా ఉన్న ఆమెకు పూర్తి గర్భకాలం నిండకముందే నొప్పులు ప్రారంభమవడంతో, అంబులెన్స్‌లోనే వైద్య సహాయం అందించారు. బాధితురాలిని ఎడమ వైపుకు పడుకోబెట్టి, అనంతరం లిథోటమీ స్థితిలో ఉంచి ప్రసవానికి సహకరించారు. ఈ క్రమంలో ఆడ శిశువు సురక్షితంగా జన్మించింది. పుట్టిన వెంటనే శిశువు ఏడుస్తూ స్పందించడంతో పాటు ఆరోగ్యంగా ఉన్నట్లు సిబ్బంది తెలిపారు. శిశువును పొడిగా, వెచ్చగా ఉంచి అవసరమైన ప్రాథమిక చికిత్స అందించారు. శిశువు బరువు 3.01 కిలోలు కాగా, ఏపీజీఏఆర్ స్కోరు 10గా నమోదైంది. తల్లి, శిశువు ఇద్దరూ క్షేమంగా ఉన్నట్లు వైద్యులు తెలిపారు. ఈ సేవలో ఈఎంటీ ఎం. సుహాసిని, పైలట్ ఎం. నాగేంద్ర బాబు పాల్గొన్నారు. పర్యవేక్షణలో డా. మనీష్ ఉన్నారు.