కాంగ్రెస్ మోసాలను ఎండగట్టేందుకు బీఆర్ఎస్ బాకీ కార్డు ఉద్యమం

మల్లాపూర్, అక్టోబర్ 8 (తెలంగాణ ముచ్చట్లు):

మోసపూరిత హామీలతో అధికారంలోకి వచ్చిన కాంగ్రెస్ పార్టీ ప్రజలకు చేసిన వాగ్దానాలను నెరవేర్చకుండా మోసం చేసిందని ఉప్పల్ ఎమ్మెల్యే బండారి లక్ష్మారెడ్డి తీవ్రంగా విమర్శించారు. బీఆర్ఎస్ పార్టీ ఆధ్వర్యంలో చేపట్టిన "బాకీ కార్డు" ఉద్యమంలో భాగంగా మల్లాపూర్ ప్రాంతంలో ఇంటింటా తిరిగి బాకీ కార్డులను పంపిణీ చేశారు. ఈ సందర్భంగా ఎమ్మెల్యే మాట్లాడుతూ, “ఏ వర్గానికి కాంగ్రెస్ ఎంత బాకీ ఉందో ఇంటింటికి ఈ బాకీ కార్డుల ద్వారా వివరించి, వారి మోసాలను ఎండగట్టాలి. రాబోయే స్థానిక సంస్థల ఎన్నికల్లో, జూబ్లీహిల్స్ ఉప ఎన్నికల్లో కాంగ్రెస్ పార్టీకి తగిన గుణపాఠం చెప్పాలి” అని పిలుపునిచ్చారు.రైతు బంధు, కళ్యాణ లక్ష్మి, షాదీ ముబారక్, మహిళా పథకాలు, యువజన ప్రోత్సాహక పథకాలు తదితర హామీలను నెరవేర్చడంలో ముఖ్యమంత్రి రేవంత్ రెడ్డి ప్రభుత్వం పూర్తిగా విఫలమైందని ఆయన విమర్శించారు.“ప్రజలకు హామీల పేరుతో లక్షలాది రూపాయల బాకీ పడిన కాంగ్రెస్ ప్రభుత్వం తక్షణమే ఆ మొత్తాలను చెల్లించాలి” అని డిమాండ్ చేశారు.“కళ్యాణ లక్ష్మి, షాదీ ముబారక్ పథకాలకు తులం బంగారం ఇస్తానని హామీ ఇచ్చిన ముఖ్యమంత్రి ఇప్పటివరకు ఏం చేశాడు?” అని ప్రశ్నించారు.ఈ కార్యక్రమంలో బీఆర్ఎస్ కార్పొరేటర్లు, మాజీ కార్పొరేటర్లు, పార్టీ నాయకులు, కార్యకర్తలు తదితరులు పెద్ద ఎత్తున పాల్గొన్నారు.