ఏ ఎస్ రావు నగర్, సెప్టెంబర్ 23 (తెలంగాణ ముచ్చట్లు):
తెలంగాణ ప్రజా సాంస్కృతిక కేంద్రం స్ఫూర్తి గ్రూప్ ప్రధాన కార్యకర్త, రచయిత, విద్యావేత్త పి. జయ ప్రకాష్ (80) మంగళవారం ఉదయం గుండెపోటుతో హఠాత్తుగా కన్ను మూశారు. ఆయన మరణం ప్రజా ఉద్యమ వర్గాల్లో తీవ్ర విషాదాన్ని మిగిల్చింది.చిన్ననాటి కష్టాల నుంచే ధైర్యం:చిన్న వయసులోనే పోలియో వ్యాధి కారణంగా కాళ్లు దెబ్బతిన్నా, జీవితంపై ఆశలు వదలకుండా, మొక్కవోని ధైర్యంతో ముందుకు సాగారు. ఆ దృఢసంకల్పమే ఆయనను సాహిత్య, విద్యా, ప్రజా ఉద్యమ రంగాల్లో ప్రత్యేక స్థానానికి చేర్చింది.ఈసీఐఎల్లో సేవలతో మొదలైన ప్రయాణం జయప్రకాష్ ఈసీఐఎల్లో ఉద్యోగం చేసి, వాలంటరీ రిటైర్మెంట్ తీసుకున్నారు. ఉద్యోగ జీవితంలోనే కార్మికుల కోసం విజ్ఞానాన్ని పంచే ప్రయత్నాలు మొదలు పెట్టారు. ప్రతి నెలా సైక్లోస్టైల్ పత్రికలు వెలువరించి, కార్మికుల్లో చైతన్యం కలిగించడంలో ముందుండేవారు. ఆ పత్రికలు కార్మిక ఉద్యమానికి అద్దం పట్టాయి.
విద్యారంగంలో స్ఫూర్తి:రిటైర్మెంట్ తరువాత అనేక విద్యాసంస్థల్లో అధ్యాపకునిగా పని చేశారు. ఆయన బోధన శైలి అనేకమంది విద్యార్థుల జీవితాలను మలుపుతిప్పింది. జ్ఞానాన్ని పంచుకోవడమే ఆయన ప్రధాన ధ్యేయం.రచయితగా విస్తారమైన కృషి:ప్రజా సమస్యలు, విద్యా సంస్కరణలు, కార్మిక హక్కులు, సామాజిక సమానత్వం వంటి అంశాలపై 100కుపైగా వ్యాసాలు రాశారు. ఇవి అనేక పత్రికల్లో ప్రచురితమయ్యాయి. విశేషం ఏమంటే, ఆయన చివరి వ్యాసం “విద్య కోసం లాంగ్ మార్చ్” మరణించిన రోజే (సెప్టెంబర్ 23) తెలుగు నాడు పత్రికలో వెలువడింది.ఉద్యమాల పట్ల అంకితభావం: ప్రజా తంత్ర ఉద్యమంలో జయప్రకాష్ ఎప్పుడూ ముందుండేవారు. భారత కమ్యూనిస్టు పార్టీ (మార్క్సిస్టు)లో సభ్యుడిగా పనిచేసి, పార్టీ కార్యక్రమాల్లో సక్రియంగా పాల్గొన్నారు. ఆయన భార్య అరవింద కుమారి కూడా ప్రజా ఉద్యమంలో చురుకుగా పనిచేసి, రెండు సంవత్సరాల క్రితం కన్నుమూశారు. ప్రస్తుతం కుమార్తె తన తండ్రిని అంకితభావంతో చూసుకుని సేవలందించారు.సంతాపం వెల్లువ:జయప్రకాష్ మరణం పట్ల స్ఫూర్తి గ్రూప్ నాయకులు గొడుగు యాదగిరిరావు, శ్రీమన్నారాయణ, కోమటి రవి, కృష్ణమాచార్యులు, జయరాజ్, శివరామకృష్ణ, పి.బి. చారి సంతాపం వ్యక్తం చేశారు. అలాగే సిపిఎం నేతలు జిల్లా కార్యదర్శి సత్యం, చంద్రశేఖర్, శ్రీనివాస్, శ్రీనివాసరావు, ఉన్నికృష్ణన్, ఎన్. శ్రీనివాస్, ఈసీఐఎల్ సహచరులు, స్నేహితులు నివాళులు అర్పించారు.అంతిమ యాత్ర:జయప్రకాష్ అంత్యక్రియలు బుధవారం ఉదయం 10–11 గంటల మధ్య లాలాపేట్ స్మశాన వాటికలో నిర్వహించనున్నారు. అంతకు ముందు ఉదయం 9 గంటలకు మౌలాలి హౌసింగ్ బోర్డు సమీపంలోని 1000 పిల్లర్స్ టవర్స్ వద్ద నివాసం నుంచి చివరి యాత్ర ప్రారంభమవుతుంది.
Comments