షరతులు లేకుండా రుణమాఫీ పూర్తి చేయాలి 

తెలంగాణ ముచ్చట్లు,జఫర్గడ్:

రెండు లక్షల వరకు రుణమాఫీ ఏక కాలంలో చేస్తామని ఎన్నికల సందర్భంగా వాగ్దానం చేసి అమలులో అనేక నిబంధనలను విధించి రైతుల సంఖ్య కుదింపు చేయడం సరికాదని, షరతులు లేకుండా రుణమాఫీ చేయాలని సిపిఎం జిల్లా కార్యదర్శి వర్గ సభ్యులు రాపర్తి సోమయ్య డిమాండ్ చేశారు. బుధవారం మండల కేంద్రంలోని తహశీల్దార్ కార్యాలయం ఎదుట సిపిఎం మండల కమిటీ ఆధ్వర్యంలో ధర్నా నిర్వహించి వివిధ డిమాండ్లతో కూడిన వినతి పత్రాన్ని తహశీల్దార్ శంకరయ్యకు అందజేశారు. అనంతరం గుండెబోయిన రాజు అధ్యక్షతన జరిగిన సమావేశంలో సోమయ్యమాట్లాడుతూ... రాష్ట్ర క్యాబినెట్ మంత్రులు రోజుకో ప్రకటన చేయడంతో రైతుల్లో గందరగోళం నెలకొందని,తుది విడత గడువు ప్రకటించి షరతులు లేకుండా రుణమాఫీ చేయాలన్నారు. ఎన్నికలు నాడు ఏక కాలంలో రెండు లక్షలు వరకు రైతు రుణమాఫీ చేస్తామని వాగ్దానం చేసి, రాష్ట్రంలో లక్షల మందిరైతులు ఉంటే కేవలం కొంత మంది రైతులకు మాత్రమే రుణమాఫీ చేశారని, ఎలాంటి షరతులు లేకుండా రుణమాఫీ చేయాలని డిమాండ్ చేశారు. లేనిపక్షంలో రాష్ట్రంలో రైతులందరూ ఏకం చేసి ధర్నాలు చేస్తామని ప్రభుత్వాన్ని హెచ్చరించారు.ఈ కార్యక్రమంలో కాట సుధాకర్, వేల్పుల రవి,నక్క యాకయ్య,  వడ్లకొండ సుధాకర్, నల్లతీగల శీను, గంగరాజు ,వేల్పుల రామన్న, అజయ్, ఎం.డి శంషోదీన్, వడ్లకొండ రాజు,వేల్పుల సంపత్ ,వేల్పుల చిన్న రాములు, పులిగిల్ల నాగరాజు తదితరులు పాల్గొన్నారు.