సుత్తితో తలపై దాడి.. వ్యక్తి మృతి.

జవహర్‌నగర్, ఆగస్టు 24, తెలంగాణ ముచ్చట్లు:

మేడ్చల్ జిల్లా జవహర్‌నగర్ పోలీస్ స్టేషన్ పరిధిలో తీవ్ర విషాదకర ఘటన చోటుచేసుకుంది. అల్లుడితో జరిగిన ఘర్షణలో సుత్తితో తలపై దాడి చేయడంతో ఓ వ్యక్తి మృతి చెందినట్లు ఫిర్యాదు అందింది.
పోలీసులకు అందిన ఫిర్యాదు ప్రకారం.. సాయిబాబా కాలనీ, దొండతోటకు చెందిన లింగనోళ్ల అండాలు తన భర్త మొగిలితో కలిసి గత పదేళ్లుగా అక్కడ నివసిస్తున్నారు. వీరికి ముగ్గురు కుమార్తెలు ఉండగా, ముగ్గురికి వివాహాలు జరిగినట్లు తెలిపారు.
ఆగస్టు 23న దొండతోటలోని పెద్ద కుమార్తె ఇంటి వద్ద బోనాల పండుగ జరుగుతుండగా, మొగిలి సాయంత్రం సుమారు 6 గంటల సమయంలో బయటకు వెళ్లి రాత్రి 8 గంటల సమయంలో ముఖంపై గాయాలతో తిరిగి వచ్చినట్లు అండాలు తెలిపారు. పొరుగువారితో జరిగిన వాగ్వాదంలో తనపై దాడి జరిగిందని మొగిలి చెప్పినట్లు పేర్కొన్నారు.
ఆ తర్వాత మొగిలి తన అల్లుడు శివతో గొడవకు దిగినట్లు తెలిపారు. ఈ క్రమంలో మొగిలి కిటికీలను ధ్వంసం చేయడంతో పాటు విద్యుత్ వైర్‌ను తొలగించి, శివకు చెందిన మోటార్‌సైకిల్‌ను కూడా ధ్వంసం చేసినట్లు ఫిర్యాదులో పేర్కొన్నారు.
దీంతో ఆగ్రహానికి గురైన శివ సుత్తితో మొగిలి తలపై రెండుసార్లు బలంగా కొట్టినట్లు ఫిర్యాదుదారు ఆరోపించారు. దీంతో మొగిలి అక్కడికక్కడే స్పృహ కోల్పోయినట్లు తెలిపారు. ఇతరులు జోక్యం చేసుకోవడంతో శివ అక్కడి నుంచి వెళ్లిపోయినట్లు పేర్కొన్నారు.
వెంటనే 108 అంబులెన్స్‌కు సమాచారం అందించగా, సంఘటనా స్థలానికి చేరుకున్న అంబులెన్స్ సిబ్బంది మొగిలిని పరీక్షించి అప్పటికే మృతి చెందినట్లు నిర్ధారించినట్లు తెలిపారు.
తన భర్త మొగిలి మృతికి అల్లుడు శివ సుత్తితో తలపై కొట్టడమే కారణమని ఫిర్యాదుదారు ఆరోపించారు. ఈ ఘటనపై పోలీసులు కేసు నమోదు చేసి దర్యాప్తు చేపట్టినట్లు సమాచారం. నిందితుడిపై చట్టపరమైన చర్యలు తీసుకోవాలని బాధిత కుటుంబ సభ్యులు కోరుతున్నారు.