మహంకాళి దేవాలయ నిర్మాణానికి శివ శంకర్ రెడ్డి భారీ విరాళం

హన్మకొండ,తెలంగాణ ముచ్చట్లు:

హన్మకొండ జిల్లా హసన్‌పర్తి గ్రామంలో నిర్మాణంలో ఉన్న మహంకాళి దేవాలయానికి సమాజ సేవకుడు,ఎస్ఆర్ఆర్ ఇన్ఫ్రా & డెవలపర్స్ అధినేత వెల్గటి శివ శంకర్ రెడ్డి తన వంతుగా ₹1,11,116 విరాళంగా అందించారు.

గ్రామస్థులు, భక్తులు కలిసి మహంకాళి అమ్మవారి ఆలయాన్ని ప్రతిష్టాత్మకంగా నిర్మిస్తున్న ఈ సందర్భంలో, శివ శంకర్ రెడ్డి అందించిన ఈ సాయం ఆలయ నిర్మాణానికి మరింత ఊతం కలిగించనుంది. ఈ సందర్భంగా ఆయన మాట్లాడుతూ, “గ్రామ ప్రజల ఆధ్యాత్మిక అభివృద్ధి కోసం, సంప్రదాయాల పరిరక్షణ కోసం దేవాలయ నిర్మాణం ఎంతో ముఖ్యమైనది. మన సంస్కృతి, సాంప్రదాయాలను భావితరాలకు అందించే కేంద్రంగా ఈ ఆలయం నిలవాలి” అని తెలిపారు.

ఆలయ కమిటీ సభ్యులు ఆయన ఉదారతను ప్రశంసిస్తూ, ఈ విరాళం గ్రామ అభివృద్ధి, ఆధ్యాత్మిక వాతావరణం బలపడటానికి ఎంతో దోహదం చేస్తుందని పేర్కొన్నారు. భక్తుల సహకారంతో మహంకాళి దేవాలయం త్వరలో పూర్తి కావాలని, అందరికీ పూజా కార్యక్రమాలు, ఉత్సవాలు నిర్వహించడానికి అవకాశం లభించాలని వారు ఆకాంక్షించారు.
గ్రామ ప్రజలు, భక్తులు శివ శంకర్ రెడ్డి చేసిన ఈ సేవా కార్యక్రమాన్ని అభినందిస్తూ, “ఇలాంటి దాతలు సమాజంలో పెరగాలి” అని అభిప్రాయపడ్డారు.