ప్రజా ప్రభుత్వం వచ్చిన ఒకే సంవత్సరంలో రాష్ట్రంలో సామాజిక మార్పు 

-గెజిటెడ్ ఆఫీసర్స్ అసోసియేషన్ డైరీ, క్యాలెండర్‌ను ఆవిష్కరణ 

హైదరాబాద్,తెలంగాణ ముచ్చట్లు:
ప్రజా ప్రభుత్వం అధికారంలోకి వచ్చిన ఒకే సంవత్సరంలో రాష్ట్రంలో సామాజిక మార్పు సాధించామని, ఆర్థికపరమైన మార్పులు తీసుకురావడానికి మరికొంత సమయం అవసరమని ముఖ్యమంత్రి రేవంత్ రెడ్డి అన్నారు. డాక్టర్ బీఆర్ అంబేద్కర్ రాష్ట్ర సచివాలయంలో తెలంగాణ గెజిటెడ్ ఆఫీసర్స్ అసోసియేషన్ 2025 డైరీ, క్యాలెండర్‌ను ఆవిష్కరించిన తర్వాత ఆయన ఈ మాటలు చెప్పారు. ఉప ముఖ్యమంత్రి మల్లు భట్టి విక్రమార్క, పలువురు మంత్రులు, ఉద్యోగ సంఘాల ప్రతినిధులు ఈ కార్యక్రమంలో పాల్గొన్నారు.

ఉద్యోగుల పాత్ర కీలకం

రాష్ట్ర సంక్షేమం, అభివృద్ధి ప్రజలకు చేరవేసే క్రమంలో ప్రభుత్వ ఉద్యోగుల పాత్ర అత్యంత కీలకమని సీఎం పేర్కొన్నారు. ఉద్యోగుల సమస్యలను వీలైనంత త్వరగా పరిష్కరించి, వారికి నష్టం కలిగించే నిర్ణయాలు ప్రభుత్వం ఎప్పటికీ తీసుకోదని హామీ ఇచ్చారు. చర్చల ద్వారానే సమస్యలను పరిష్కరించాల్సి ఉంటుందని, నిరసనలు, ధర్నాలు అవసరం లేదన్నారు.

ఆర్థిక పరిస్థితుల అవగాహన

గత పదేళ్ల పరిపాలనలో అవినీతి, విధాన దౌర్బల్యాలు పరిపాలన వ్యవస్థను నాశనం చేశాయని, అయితే తన ప్రభుత్వం ఆ వ్యవస్థను పునరుద్ధరించే ప్రయత్నంలో ఉందని సీఎం వివరించారు. ప్రస్తుత ఆర్థిక పరిస్థితుల నేపథ్యంలో ప్రభుత్వానికి నెలకు రూ. 22,500 కోట్లు అవసరం ఉండగా, రూ. 18,500 కోట్లే ఆదాయం వస్తోందని తెలిపారు. ఈ లోటు కారణంగా కొన్ని సమస్యలు తక్షణం పరిష్కరించలేకపోతున్నామని 
సీఎం చెప్పారు.

ఉద్యోగుల జీతభత్యాల కోసం వెచ్చింపు

ప్రస్తుతం అందుతున్న ఆదాయంలో రూ. 6,500 కోట్లు ఉద్యోగుల జీతభత్యాలకు, రూ. 6,500 కోట్లు అప్పుల చెల్లింపులకు వెచ్చిస్తున్నామని, మిగిలిన రూ. 5,500 కోట్లు సంక్షేమ పథకాలకు కేటాయిస్తున్నామని సీఎం వివరించారు. అయితే ప్రభుత్వానికి ప్రతీ నెల అవసరమైన మొత్తం రూ. 30 వేల కోట్లు కాగా, ఈ లోటును తీర్చడానికి ఉద్యోగుల సహకారం అవసరమని ఆయన అభిప్రాయపడ్డారు.

ఔట్‌సోర్సింగ్ ఉద్యోగుల క్రమబద్ధీకరణపై స్పష్టత

సర్వశిక్షా అభియాన్ వంటి కేంద్ర పథకాల కింద పనిచేస్తున్న ఔట్‌సోర్సింగ్ ఉద్యోగులను క్రమబద్ధం చేయడం సాధ్యం కాదని, నిబంధనలకు వ్యతిరేకంగా ఎలాంటి చర్యలూ తీసుకోలేమని సీఎం స్పష్టం చేశారు. కొందరు రాజకీయ కారణాలతో ఉద్యోగులను భ్రాంతికి గురిచేస్తున్నారని, అలాంటి వ్యక్తుల పట్ల అప్రమత్తంగా ఉండాలని సూచించారు.

సమస్యల పరిష్కారానికి హామీ.. ఉద్యోగుల సమస్యలను అర్థం చేసుకుని కార్యాచరణ పథకం ప్రకారం పరిష్కరించనున్నట్లు ముఖ్యమంత్రి హామీ ఇచ్చారు.ఈ కార్యక్రమంలో మంత్రులు ఉత్తమ్ కుమార్ రెడ్డి , కోమటిరెడ్డి వెంకటరెడ్డి , సీఎం సలహాదారు వేం నరేందర్ రెడ్డి , పీసీసీ అధ్యక్షుడు, ఎమ్మెల్సీ మహేశ్ కుమార్ గౌడ్, ఎమ్మెల్యేలు అడ్లూరి లక్ష్మణ్ కుమార్, నాయిని రాజేందర్ తో పాటు ఉద్యోగ సంఘాల ప్రతినిధులు పాల్గొన్నారు.