మహిళల సాధికారతకు శ్రీ శక్తి అవార్డులు ప్రేరణ

మల్లాపూర్, మార్చి 11 (తెలంగాణ ముచ్చట్లు):

మల్లాపూర్ డివిజన్‌లోని మున్సిపల్ వార్డ్ గ్రౌండ్‌లో అంతర్జాతీయ మహిళా దినోత్సవాన్ని పురస్కరించుకుని నిర్వహించిన శ్రీ శక్తి అవార్డుల ప్రధానోత్సవ కార్యక్రమం ఘనంగా జరిగింది. ఈ కార్యక్రమానికి ముఖ్య అతిథిగా కాంగ్రెస్ పార్టీ నాయకులు నెమలి అనిల్ కుమార్ హాజరై మహిళలను అభినందించారు.ఈ సందర్భంగా నెమలి అనిల్ కుమార్ మాట్లాడుతూ మహిళలు నేటి సమాజంలో ప్రతి రంగంలో ముందంజలో నిలుస్తూ కుటుంబం, సమాజం మరియు దేశ అభివృద్ధిలో కీలక పాత్ర పోషిస్తున్నారని తెలిపారు. మహిళల సాధికారతకు ప్రభుత్వం, సమాజం కలిసి కృషి చేయాల్సిన అవసరం ఉందన్నారు.మహిళా దినోత్సవాన్ని పురస్కరించుకుని మహిళలకు ప్రోత్సాహం కలిగించే ఉద్దేశంతో శ్రీ శక్తి అవార్డులను ఏర్పాటు చేసి ఘనంగా నిర్వహించడం అభినందనీయమని ఆయన పేర్కొన్నారు. మహిళలు విద్య, ఉపాధి, సామాజిక సేవ వంటి రంగాల్లో మరింతగా ముందుకు రావాలని ఆకాంక్షించారు.ఈ కార్యక్రమంలో స్థానిక నాయకులు, మహిళా ప్రతినిధులు, కార్యకర్తలు మరియు పెద్ద సంఖ్యలో మహిళలు పాల్గొన్నారు.