అభివృద్ధి పథంలో వరంగల్ పశ్చిమ నియోజకవర్గం 

హన్మకొండ,తెలంగాణ ముచ్చట్లు:

హనుమకొండ ఆర్ట్స్ అండ్ సైన్స్ ఆడిటోరియంలో జరిగిన ప్రజా పాలన విజయోత్సవ సభకు వరంగల్ పశ్చిమ నియోజకవర్గ ఎమ్మెల్యే నాయిని రాజేందర్ రెడ్డి అధ్యక్షత వహించారు. గత ఏడాది కాలంలో నియోజకవర్గ అభివృద్ధి, సంక్షేమంలో జరిగిన పురోగతిని ఈ సందర్భంగా ప్రస్తావించారు.

ఈ కార్యక్రమంలో పాల్గొన్న వర్ధన్నపేట ఎమ్మెల్యే, విశ్రాంత ఐపీఎస్ అధికారి కేఆర్ నాగరాజు మాట్లాడుతూ, ప్రజల కోసం నిరంతరం కృషి చేస్తున్న ముఖ్యమంత్రి రేవంత్ రెడ్డి నాయకత్వాన్ని కొనియాడారు. నియోజకవర్గ అభివృద్ధి కోసం నిధుల సమీకరణకు ప్రాధాన్యం ఇస్తామని, అందరి మద్దతుతో ప్రజల అవసరాలను నెరవేర్చేందుకు కృషి కొనసాగిస్తామని తెలిపారు.

నియోజకవర్గానికి ప్రాధాన్యత:
ముఖ్యమంత్రి రేవంత్ రెడ్డి ఉమ్మడి వరంగల్ జిల్లాకు 500 కోట్ల రూపాయల నిధులు కేటాయించారని, ఈ నిధులతో మామునూరు ఎయిర్‌పోర్ట్, కాజీపేట కోచ్ ఫ్యాక్టరీ వంటి ప్రాజెక్టులు వేగంగా ముందుకు సాగుతున్నాయని చెప్పారు. గత ప్రభుత్వాలు దాటవేసిన సమస్యలను ప్రజా ప్రభుత్వం సమర్థంగా పరిష్కరిస్తోందని అభిప్రాయపడ్డారు.

నయీమ్ నగర్ నాలా పూర్తి:
వర్షాకాలంలో ఇబ్బందులు ఎదుర్కొంటున్న నయీమ్ నగర్ ప్రాంతంలో నాలా పనులు ఏడాది కాలంలో పూర్తి చేసి ప్రజలకు కష్టాలు తప్పించామని కేఆర్ నాగరాజు వివరించారు.

ప్రతిపక్షాలపై విమర్శలు:
ప్రజా ప్రభుత్వం సాధిస్తున్న విజయాలు ప్రతిపక్షాలకు సహించలేకపోతున్నాయని, అసత్య ప్రచారాలతో ప్రజలను మోసం చేయాలని చూస్తున్నాయని ఆయన విమర్శించారు.ఈ సభకు వరంగల్ ఎంపీ కడియం కావ్య, ఎమ్మెల్సీ బసవరాజు సారయ్య, నగర మేయర్ గుండు సుధారాణి, ఇతర ప్రజాప్రతినిధులు, కార్పొరేటర్లు, పార్టీ నాయకులు, కార్యకర్తలు హాజరయ్యారు.