విద్యార్థులు కష్టపడి చదివి ఉన్నత స్థాయికి ఎదగాలి

పెద్దమందడి, సెప్టెంబర్ 19 (తెలంగాణ ముచ్చట్లు):

వనపర్తి జిల్లా పెద్దమందడి ప్రాథమిక పాఠశాలలో విద్యార్థులకు ఆకర్షణీయంగా తయారు చేసిన కొత్త తరగతి గదులను జిల్లా పోలీసు అధికారి రావుల గిరిధర్ శుక్రవారం ప్రారంభించారు. ఈ సందర్భంగా విద్యార్థులకు బూట్లను పంపిణీ చేశారు.
జిల్లా ఎస్పీ విద్యార్థులను ఉద్దేశించి మాట్లాడుతూ –
“విద్యార్థులు కష్టపడి చదివి ఉన్నత స్థాయికి ఎదగాలి. తల్లిదండ్రులు గర్వపడే స్థాయికి చేరుకోవాలి. మీరు అనుకున్న లక్ష్యాలను సాధించాలంటే నిబద్ధతతో కఠినంగా శ్రమించాలి. ప్రణాళికాబద్ధంగా చదవడం ద్వారా కలలను సాకారం చేసుకోవచ్చు. చెడు అలవాట్లకు దూరంగా ఉండి సమయాన్ని వృథా చేయకుండా కష్టపడి చదివితే కావలసిన ఉద్యోగాలు సాధించవచ్చు” అని సూచించారు.
అలాగే, ప్రభుత్వ పాఠశాలల్లో ఇప్పుడు అన్ని మౌలిక సదుపాయాలు అందుబాటులో ఉన్నాయని, రాష్ట్రంలో పేరొందిన ప్రముఖులు, అధికారులు కూడా ప్రభుత్వ పాఠశాలల్లో చదివి ఉన్నత స్థానాలకు చేరారని గుర్తు చేశారు. మంచి పుస్తకాలు, మంచి స్నేహితులు ఎంచుకుంటే జీవితంలో విజయాలు సాధ్యమని విద్యార్థులకు సూచించారు.
ఈ కార్యక్రమంలో విద్యాశాఖ అధికారి మంజులత, పెద్దమందడి పోలీసు అధికారి శివకుమార్, పన్నుల శాఖ అధికారి ప్రసన్న రెడ్డి, ప్రధానోపాధ్యాయులు బండి శ్రీనివాసులు, ఉపాధ్యాయులు శ్రీనివాస్, రోజా రాణి, కిరణ్ కుమార్, సుచిత్ర, ఈశ్వర్, మధు తదితరులు, విద్యార్థులు పాల్గొన్నారు.