సంక్షేమ వసతి గృహాల్లో డైట్, కాస్మోటిక్స్ చార్జీల పెంపు ప్రారంభం

హసన్ పర్తి,తెలంగాణ ముచ్చట్లు:రాష్ట్ర ప్రభుత్వం ప్రతిష్టాత్మకంగా చేపట్టిన సంక్షేమ వసతి గృహాలు, గురుకుల పాఠశాలల్లో డైట్, కాస్మోటిక్స్ చార్జీల పెంపు కార్యక్రమం హసన్పర్తి మండల కేంద్రంలోని తెలంగాణ రాష్ట్ర గురుకుల పాఠశాల, కళాశాల (గర్ల్స్)లో ప్రారంభమైంది.

ఈ కార్యక్రమానికి వర్ధన్నపేట ఎమ్మెల్యే కేఆర్ నాగరాజు, హనుమకొండ ఇన్‌చార్జ్ కలెక్టర్ సత్య శారద హాజరై కొత్త డైట్ మెనూను ఆవిష్కరించారు. విద్యార్థుల అవసరాలకు అనుగుణంగా రూపొందించిన ఎస్ఓపీ హ్యాండ్‌బుక్‌ను కూడా విడుదల చేశారు.

ఈ సందర్భంగా ఎమ్మెల్యే నాగరాజు మాట్లాడుతూ, 8 ఏళ్ల తర్వాత డైట్ చార్జీలు, 16 ఏళ్ల తర్వాత కాస్మోటిక్స్ చార్జీల పెంపు జరిగిందని చెప్పారు. మంచి ఆహారం అందిస్తేనే విద్యార్థుల ఆరోగ్యం, చదువులో ఆసక్తి పెరుగుతుందని అన్నారు.

ఎమ్మెల్యే మాట్లాడుతూ, మహిళల కోసం పోటీ పరీక్షల్లో 33% రిజర్వేషన్ కల్పించడమే కాకుండా పాఠశాలలో అన్ని సౌకర్యాలు అందుబాటులో ఉన్నాయని అన్నారు. వంద శాతం ఉత్తీర్ణత లక్ష్యంగా విద్యార్థులు కృషి చేయాలని సూచించారు.ఈ కార్యక్రమంలో విద్యార్థుల ప్రదర్శన అందరినీ ఆకట్టుకుంది.
ఈ కార్యక్రమంలో పాఠశాల ప్రిన్సిపాల్ అశోక్ రెడ్డి, స్థానిక కార్పొరేటర్ అరుణ, తహసీల్దార్ ప్రసాద్,
ఉపాధ్యాయులు, విద్యార్థుల తల్లిదండ్రులు పాల్గొన్నారు.