పెండింగ్ బిల్లులు, వేతనాలు వెంటనే విడుదల చేయాలి

మేడ్చల్ మల్కాజ్గిరి కలెక్టర్, అక్టోబర్ 30 (తెలంగాణ ముచ్చట్లు):

తెలంగాణ మధ్యాహ్న భోజన పథకంలో పనిచేస్తున్న కార్మికులకు పెండింగ్‌లో ఉన్న బిల్లులు, వేతనాలు తక్షణం విడుదల చేయాలని ప్రభుత్వం ఇచ్చిన హామీని అమలు చేయాలని తెలంగాణ మిడ్ డే మీల్స్ వర్కర్స్ యూనియన్ (సిఐటియు) నేతలు డిమాండ్ చేశారు.గురువారం కలెక్టర్ కార్యాలయం వద్ద నిర్వహించిన ధర్నాలో యూనియన్ జిల్లా అధ్యక్షుడు ఉన్నికృష్ణన్ కె., కార్యదర్శి ప్రేమలత మాట్లాడుతూ పాఠశాలలు ప్రారంభమైనప్పటి నుంచి ఇప్పటివరకు కార్మికులకు ఒక్క రూపాయి కూడా చెల్లించలేదని ఆవేదన వ్యక్తం చేశారు. దసరా పండగ రోజున కూడా కుటుంబాలు పస్తులయ్యే పరిస్థితి ఏర్పడిందని తెలిపారు. ఎన్నికల ముందు కార్మికులకు రూ.10,000 వేతనం ఇస్తామని కాంగ్రెస్ ప్రభుత్వం హామీ ఇచ్చిందని, ఆ వాగ్దానం ఇప్పటికైనా అమలు చేయాలని కోరారు. నెలల తరబడి వేతనాలు రాకపోతే వంట ఎలా చేస్తారని ప్రశ్నించారు. కొత్త మెనూ పేరుతో ఉపాధ్యాయులు, అమ్మ ఆదర్శ కమిటీలు కార్మికులను ఇబ్బందులకు గురిచేస్తున్నారని పేర్కొన్నారు.
కార్మికులు విద్యార్థులను తమ కుటుంబసభ్యుల్లా భావించి నాణ్యమైన భోజనం అందిస్తున్నారని, ప్రభుత్వం ఈ సేవాభావాన్ని గుర్తించి వెంటనే పెండింగ్ బిల్లులు విడుదల చేయాలని విజ్ఞప్తి చేశారు. పెరుగుతున్న ధరలను దృష్టిలో ఉంచుకుని మెనూ చార్జీలను పెంచాలని, అంగన్‌వాడీ మాదిరిగా గుడ్లను ప్రభుత్వం సరఫరా చేయాలని, ఉచిత గ్యాస్, కాటన్ యూనిఫామ్ అందించాలని, కనీస వేతనం రూ.26,000 అమలు చేయడమేగాక ఈఎస్ఐ, పీఎఫ్ సౌకర్యాలు కల్పించాలని డిమాండ్ చేశారు.ధర్నాలో సిఐటియు జిల్లా ఉపాధ్యక్షుడు ఎన్. శ్రీనివాస్, యూనియన్ నాయకులు విజయలక్ష్మి, మంజుల, జయ తదితరులు పాల్గొన్నారు.