వనపర్తి, ఆగస్టు19(తెలంగాణ ముచ్చట్లు):
వనపర్తి జిల్లా పెద్దమందడి మండలంలోని అల్వాల గ్రామంలో మంగళవారం పోచమ్మ బోనాలు ఘనంగా నిర్వహించారు. గ్రామ దేవతకు ప్రత్యేక పూజలు, అర్చనలు చేసి భక్తి శ్రద్ధలతో గ్రామస్తులు ఉత్సవాల్లో పాల్గొన్నారు.ఉదయం నుంచి గ్రామ వీధులన్నీ పండుగ వాతావరణంలో కళకళలాడాయి. మహిళలు సంప్రదాయ చీరలు ధరించి తలపై అలంకరించిన బోనాలు మోసుకుంటూ ఊరేగింపుగా పోచమ్మ గుడికి చేరుకున్నారు. డప్పులు, తాళాలు, కీర్తనల మధ్య భక్తులు ఉత్సాహంగా పాల్గొన్నారు. యువత సాంప్రదాయ నృత్యాలు, సాంస్కృతిక కార్యక్రమాలతో సందడి మరింత పెంచారు.
మొక్కుబడులు తీర్చుకునే భాగంగా భక్తులు కోళ్లు, మేకలను పోచమ్మ తల్లికి నైవేద్యంగా అర్పించారు. పెద్ద సంఖ్యలో భక్తులు హాజరై గ్రామమంతా పండుగ వాతావరణాన్ని తలపించింది. ప్రతి సంవత్సరం జరిగే బోనాల పండుగ మన గ్రామానికి ఐక్యత, భక్తి భావాలకు ప్రతీక అని గ్రామ పెద్దలు పేర్కొన్నారు.అల్వాల గ్రామంలో జరిగిన ఈ పోచమ్మ బోనాలు అందరినీ ఆకట్టుకొని విజయవంతంగా ముగిశాయి. ఈ కార్యక్రమంలో గ్రామ పెద్దలు, మహిళలు, యువకులు తదితరులు పాల్గొన్నారు.
Comments