వనపర్తి జిల్లా నూతన ఎస్పీగా బాధ్యతలు స్వీకరించిన సునీత 

వనపర్తి,నవంబర్24(తెలంగాణ ముచ్చట్లు):

వనపర్తి జిల్లా కొత్త ఎస్పీగా ఐపీఎస్ అధికారి డి. సునీత సోమవారం అధికారికంగా బాధ్యతలు స్వీకరించారు. మధ్యాహ్నం జిల్లా పోలీస్ కార్యాలయంలో డిఎస్పి వెంకటేశ్వరరావు పూల మొక్కలు అందజేసి స్వాగతం పలికారు. అనంతరం నూతన ఎస్పీ పోలీసుల గౌరవ వందనం స్వీకరించి, కార్యాలయంలో పదవీ బాధ్యతలు అధికారికంగా చేపట్టారు. జిల్లా ఎస్పీ సునీత మాట్లాడుతూ..జిల్లాలో ప్రజలకు చేరువగా ఉండే పోలీసింగ్ విధానాన్ని అమలు చేస్తానని, పారదర్శక పాలన, సమర్థమైన నేర నివారణ, సాంకేతిక ఆధారిత సమాచార వ్యవస్థలతో పోలీస్ విభాగాన్ని బలోపేతం చేస్తానని తెలిపారు. ప్రజలకు న్యాయం, వేగవంతమైన సేవ, భద్రత కల్పించడం ప్రధాన లక్ష్యమని, డ్రగ్ మాఫియా, చట్టవ్యతిరేక కార్యకలాపాలు, అవినీతి, అసాంఘిక ప్రవర్తనపై కఠిన చర్యలు తీసుకుంటామని హామీ ఇచ్చారు.అదేవిధంగా, మహిళలు, పిల్లలు భయం లేకుండా జీవించగల వాతావరణం కల్పించడం పోలీస్ శాఖ బాధ్యత, చట్టం ముందు అందరూ సమానంగా ఉండాలని ఎస్పీ స్పష్టంగా పేర్కొన్నారు. జిల్లా భద్రతను రాష్ట్రంలో ఆదర్శంగా తీర్చిదిద్దడమే ప్రధాన లక్ష్యమని చెప్పారు. అనంతరం జిల్లాలోని అధికారులు అపోలో పూల మొక్కలు అందజేసి శుభాకాంక్షలు తెలియజేశారు.